جموں, 03 جون (ہ س)۔

جموں و کشمیر میں آئندہ 72 گھنٹوں کے دوران موسم خراب رہنے کا امکان ہے کیونکہ ایک فعال ویسٹرن ڈسٹربنس بدھ کی دوپہر کے بعد خطے کو متاثر کرے گا۔

موسمیاتی ماہرین کے مطابق وادی کشمیر اور جموں کے کئی علاقوں میں بارش، گرج چمک، تیز ہوائیں، ژالہ باری اور آسمانی بجلی گرنے کے امکانات ہیں۔ 4 اور 5 جون کو موسم کی شدت زیادہ رہنے کی پیش گوئی کی گئی ہے، جب دوپہر اور شام کے اوقات میں وسیع پیمانے پر بارش اور گرج چمک کے ساتھ تیز ہوائیں چل سکتی ہیں۔

محکمہ موسمیات کے مطابق موسمی سرگرمیاں زیادہ تر دوپہر، شام اور رات کے اوقات میں متوقع ہیں جبکہ مسلسل بارش کا امکان نہیں ہے۔

ادھر کسانوں کو مشورہ دیا گیا ہے کہ وہ آئندہ تین روز تک کھیتوں میں کام کرنے سے گریز کریں۔ عوام سے بھی اپیل کی گئی ہے کہ گرج چمک کے دوران درختوں، بجلی کے کھمبوں اور کھلے مقامات سے دور رہیں۔

حکام نے ڈل جھیل، وولر جھیل اور دیگر آبی ذخائر میں کشتی رانی اور دیگر سرگرمیوں سے بھی خراب موسم کے دوران اجتناب کرنے کی ہدایت جاری کی ہے۔

ہندوستھان سماچار

---------------

ہندوستان سماچار / محمد اصغر