نئی دہلی، 3 جون (ہ س)۔ دہلی کے مالویہ نگر میں واقع فلورش اسٹے بی اینڈ بی ریستوراں میں بدھ کی صبح لگنے والی زبردست آگ میں کم از کم 21 افراد ہلاک ہوگئے۔ کئی دیگر کے زخمی ہونے کی اطلاعات ہیں۔ واقعہ کے بعد دہلی کے وزیر داخلہ آشیش سود اور ایم ایل اے ستیش اپادھیائے صورتحال کا جائزہ لینے کے لئے جائے وقوعہ پر پہنچے۔

جائے واقعہ کا معائنہ کرنے کے بعد وزیر آشیش سود نے کہا کہ آگ سے عمارت مکمل طور پر تباہ ہوگئی ہے۔ انہوں نے مزید کہا کہ متعلقہ حکام تمام ضروری دستاویزات اکٹھا کر رہے ہیں تاکہ یہ معلوم کیا جا سکے کہ آیا عمارت کے پاس کوئی درست نو آبجیکشن سرٹیفکیٹ (این او سی) تھا، کیا ہوٹل اور ریسٹورنٹ کو چلانے کی اجازت لی گئی تھی اور کیا بیڈ اینڈ بریک فاسٹ (بی اینڈ بی) کے طور پر چلنے والے کمروں کے لیے ضروری منظوری حاصل کی گئی تھی۔

آشیش سود نے کہا کہ اس واقعے کے ذمہ دار عمارت کے مالک اور کسی بھی لاپرواہی میں ملوث افراد کی پولیس تفتیش کے ذریعے نشاندہی کی جائے گی اور گرفتاریوں سمیت ان کے خلاف سخت کارروائی کی جائے گی۔ انہوں نے مزید کہا کہ واقعہ کی تحقیقات کے لیے پولیس ٹیمیں پہلے ہی روانہ کر دی گئی ہیں۔

آشیش سود نے کہا کہ ضلع مجسٹریٹ (ڈی ایم) کی نگرانی میں میونسپل کارپوریشن، فائر ڈپارٹمنٹ، محکمہ بجلی اور محکمہ پانی سمیت تمام متعلقہ ایجنسیوں کو پورے علاقے میں جامع معائنہ کرنے کی ہدایت دی گئی ہے۔ انہوں نے کہا کہ حفاظتی یا ریگولیٹری معیارات کی خلاف ورزی کرنے والی کسی بھی عمارت کو بخشا نہیں جائے گا، خلاف ورزی پائی جانے پر فوری کارروائی کی جائے گی۔

وزیر نے کہا کہ حکومت اس بات کی تحقیقات کر رہی ہے کہ آیا عمارت کو ضروری این او سی موصول ہوئے ہیں اور کیا بی این بی کے آپریشنز کے لیے تمام ضروری اجازتیں حاصل کی گئی تھیں۔ کسی بھی غیر قانونی تعمیر اور قصوروار پائے جانے والوں کے خلاف سخت کارروائی کی جائے گی۔

اس افسوسناک واقعے پر ردعمل ظاہر کرتے ہوئے بی جے پی لیڈر دنیش شرما نے کہا کہ مرکزی اور ریاستی حکومتوں نے اس معاملے کا نوٹس لیا ہے اور واقعے کی سنجیدگی سے تحقیقات کی جا رہی ہیں۔

ایم پی منوج تیواری نے اسے انتہائی افسوسناک واقعہ قرار دیتے ہوئے کہا کہ ابتدائی معلومات سے پتہ چلتا ہے کہ ہوٹل کے ریسٹورنٹ کے علاقے میں زبردست آگ لگ گئی۔ انہوں نے مزید کہا کہ 21 اموات کی وجہ تحقیقات کا معاملہ ہے۔ انہوں نے یہ بھی کہا کہ حکومت نظامی کمیوں کو دور کرنے اور حفاظتی معیارات کو مستحکم کرنے کے لیے مسلسل کوششیں کر رہی ہے۔

---------------

ہندوستان سماچار / عبدالسلام صدیقی