نئی دہلی، 28 جون (ہ س): اسکاٹ لینڈ کی مردوں کی قومی فٹبال ٹیم کے مرکزی کوچ اسٹیو کلارک نے اپنے عہدے سے استعفیٰ دے دیا ہے۔ اسکاٹش فٹبال ایسوسی ایشن نے اس کی اطلاع دی ہے۔

ایسوسی ایشن نے اپنے بیان میں کہا کہ اسکاٹ لینڈ کے فیفا عالمی کپ 2026 سے باہر ہونے کی تصدیق کے بعد ملک کے کامیاب ترین قومی کوچ نے اپنے سات سالہ دورِ ذمہ داری کو ختم کرنے کا فیصلہ کیا ہے۔

اسٹیو نے اپنے دورِ ذمہ داری میں اسکاٹ لینڈ کو اٹھائیس برس بعد پہلی بار مردوں کے فیفا عالمی کپ تک پہنچایا۔ اس کے علاوہ انہوں نے مسلسل دو مرتبہ یورپی فٹبال چیمپئن شپ کے لیے ٹیم کو کوالیفائی کرایا۔

اسکاٹ لینڈ نے فیفا عالمی کپ 2026 میں اپنی مہم کا آغاز ہیٹی کے خلاف ایک صفر سے کامیابی کے ساتھ کیا تھا۔ اس کے بعد مراکش اور برازیل کے ہاتھوں شکست کے باعث اسکاٹ لینڈ اپنے گروپ میں تیسرے مقام پر رہا اور ٹورنامنٹ سے باہر ہو گیا۔

اسٹیو کلارک نے اپنے دورِ ذمہ داری کے دوران ٹیم کی کامیابیوں پر فخر کا اظہار کیا۔ انہوں نے کہا کہ اس رخصتی کا سب سے جذباتی پہلو میرے کھلاڑی ہیں، جن کے بغیر 2019 سے اب تک ہم جو یادگار لمحات سمیٹ سکے، وہ ممکن نہ ہوتے۔ وہ ہر تعریف اور ہر اعزاز کے مستحق ہیں، اور ان کا کوچ کہلانا میرے لیے واقعی ایک اعزاز رہا ہے۔

انہوں نے مزید کہا کہ مجھے یہ موقع دینے پر شکریہ، اور میں اپنے جانشین کے لیے نیک تمناؤں کا اظہار کرتا ہوں۔

اسکاٹش فٹبال ایسوسی ایشن کے چیف ایگزیکٹو افسر ایان میکسویل نے کہا کہ ہم سب عالمی کپ کے گروپ مرحلے سے باہر ہونے پر مایوس ہیں، لیکن ہمیں اسٹیو کے سات سالہ دور میں ہونے والی شاندار پیش رفت کو فراموش نہیں کرنا چاہیے۔ انہوں نے اسکاٹ لینڈ کو ایک بڑے بین الاقوامی ٹورنامنٹ میں واپس لانے کی ذمہ داری نہایت کامیابی سے نبھائی۔ ہم اسٹیو کا ان کی ریکارڈ ساز خدمات اور غیر معمولی کردار پر تہہ دل سے شکریہ ادا کرتے ہیں۔

ہندوستھان سماچار

---------------

ہندوستان سماچار / عبدالواحد