نئی دہلی، 28 جون (ہ س): وزیرِ اعظم نریندر مودی نے اتوار کے روز اپنے ماہانہ ریڈیو پروگرام ’’من کی بات‘‘ میں کہا کہ جون کا مہینہ بھارت کے لیے متعدد کامیابیوں اور حوصلہ افزا اقدامات کا گواہ رہا ہے۔ انہوں نے مقامی دفاعی صلاحیت، ہوابازی کے شعبے میں پیش رفت، یوگا کی عالمی مقبولیت، آسام میں ہرگیلا تحفظ مہم، ناگالینڈ میں کھیلوں کے فروغ کی کوششوں اور سماجی تحفظ کی مختلف اسکیموں کا ذکر کرتے ہوئے کہا کہ ملک کے مختلف شعبوں میں رونما ہونے والی مثبت تبدیلیاں خود انحصار بھارت کی سمت نئی توانائی فراہم کر رہی ہیں۔

وزیرِ اعظم نے ’’من کی بات‘‘ کے 135ویں ایڈیشن میں خطاب کرتے ہوئے کہا کہ سال 2026 کا نصف حصہ گزرنے والا ہے اور گزشتہ 6 ماہ کے دوران ملک نے مختلف شعبوں میں نمایاں ترقی حاصل کی ہے۔ جون کا مہینہ خاص طور پر کئی اہم کامیابیوں اور حوصلہ افزا واقعات سے بھرپور رہا۔ ان کامیابیوں نے نہ صرف ملک کی صلاحیتوں کو اجاگر کیا بلکہ شہریوں میں بھی اعتماد کو مضبوط کیا ہے۔

انہوں نے کہا کہ حال ہی میں بھارتی بحریہ کے بیڑے میں 3 نئے جنگی جہاز شامل کیے گئے ہیں۔ ان جنگی جہازوں کا ڈیزائن، تعمیر اور تکنیکی ترقی مکمل طور پر بھارت میں انجام دی گئی ہے، جو خود انحصار بھارت مہم کی کامیابی کا ثبوت ہے۔ انہوں نے کہا کہ ملک دفاعی پیداوار کے میدان میں مسلسل نئی بلندیوں کو چھو رہا ہے اور مقامی ٹیکنالوجی پر مبنی نظام قومی سلامتی کو مزید مضبوط بنا رہے ہیں۔

وزیرِ اعظم مودی نے کہا کہ اسی ماہ بھارت میں تیار کیا گیا سی-295 فوجی نقل و حمل کا طیارہ اپنی پہلی کامیاب پرواز انجام دے چکا ہے۔ انہوں نے کہا کہ یہ صرف ایک طیارے کی پرواز نہیں بلکہ بھارت کے ہوابازی اور دفاعی صنعت کے نئے دور کا آغاز ہے۔ ملک میں ایسے 40 طیارے تیار کیے جائیں گے، جس سے فضائی صنعت کو مزید تقویت ملے گی اور نوجوانوں کے لیے روزگار کے نئے مواقع پیدا ہوں گے۔ اس سے بڑی تعداد میں خرد، چھوٹے اور متوسط درجے کے صنعتی اداروں اور بھارتی صنعتوں کو بھی فائدہ ہوگا۔ وزیرِ اعظم نے دفاعی تحقیق و ترقی کی تنظیم کے سائنس دانوں کی بھی تعریف کی۔ انہوں نے کہا کہ حال ہی میں مقامی طویل فاصلے تک زمین سے ہدف پر حملہ کرنے والی کروز میزائل کا کامیاب تجربہ کیا گیا، جو بھارت کی دفاعی صلاحیت کو مزید مضبوط بناتا ہے اور یہ ظاہر کرتا ہے کہ ملک جدید فوجی ٹیکنالوجی کی تیاری میں تیزی سے آگے بڑھ رہا ہے۔

انہوں نے بین الاقوامی یومِ یوگا کی کامیابی کا ذکر کرتے ہوئے کہا کہ اس سال یوگا ڈے پوری دنیا میں غیر معمولی جوش و خروش کے ساتھ منایا گیا۔ انہوں نے کہا کہ دنیا بھر کے 2500 سے زیادہ اہم مقامات پر یوگا سے متعلق پروگرام منعقد کیے گئے۔ بھارت سمیت کئی ممالک میں کروڑوں افراد نے یوگا کو اپنا کر صحت مند زندگی کے لیے اپنی وابستگی کا اظہار کیا۔ وزیرِ اعظم نے احمد آباد میں منعقد ہونے والی عالمی یوگ آسن چیمپئن شپ 2026 کا بھی ذکر کیا۔ وزیرِ اعظم نے کہا کہ بھارتی کھلاڑیوں نے اس مقابلے میں شاندار کارکردگی کا مظاہرہ کرتے ہوئے مجموعی طور پر 114 تمغے حاصل کیے، جن میں 102 طلائی تمغے شامل ہیں۔ یہ کامیابی عالمی سطح پر بھارت کی یوگا روایت اور کھیلوں میں مہارت کی عکاس ہے۔

وزیرِ اعظم مودی نے آسام میں جاری ہرگیلا تحفظ مہم کا ذکر کرتے ہوئے کہا کہ ایک وقت ایسا تھا جب ہرگیلا پرندے کے بارے میں معاشرے میں کئی غلط فہمیاں اور توہمات پائے جاتے تھے۔ لوگ اسے منحوس سمجھتے تھے اور اس کے گھونسلوں والے درخت بھی کاٹ دیا کرتے تھے۔ معروف حیاتیات کی ماہر پورنیما دیوی برمن اور مقامی خواتین کی کوششوں نے اس صورتِ حال کو بدل دیا۔ وزیرِ اعظم نے کہا کہ ہزاروں خواتین نے مل کر ’’ہرگیلا آرمی‘‘ تشکیل دی اور اس نایاب پرندے کے تحفظ کی مہم شروع کی۔ آج یہی پرندہ مقامی برادری کے لیے فخر کی علامت بن چکا ہے۔ انہوں نے کہا کہ یہ مہم ثابت کرتی ہے کہ عوامی شراکت اور بیداری کے ذریعے سماجی سوچ میں مثبت تبدیلی لائی جا سکتی ہے۔

انہوں نے ناگالینڈ میں کھیلوں کے فروغ کے لیے کیے جانے والے اقدامات کی بھی تعریف کی۔ انہوں نے ’’ناگالینڈ بے بی لیگ‘‘ کا ذکر کرتے ہوئے کہا کہ یہ 5 سے 12 سال کی عمر کے بچوں کے لیے ایک خصوصی فٹبال لیگ ہے۔ یہ اقدام صرف بچوں کو کھیلوں سے جوڑنے تک محدود نہیں بلکہ ان کی صلاحیت، خود اعتمادی اور شخصیت سازی میں بھی اہم کردار ادا کر رہا ہے۔ اس لیگ کا آغاز ناگالینڈ کے زیادہ سے زیادہ بچوں کو فٹبال سے جوڑنے کے مقصد سے کیا گیا تھا۔ اب یہ لیگ اپنے 3 سال مکمل کر چکی ہے اور اس میں لڑکے اور لڑکیاں دونوں حصہ لیتے ہیں۔ اس اقدام نے بچوں پر مثبت اثر ڈالا ہے اور ریاست میں کھیلوں کی ثقافت کو مضبوط بنایا ہے۔

وزیرِ اعظم مودی نے ’’ناگالینڈ ویمن فٹسل لیگ‘‘ کا بھی ذکر کیا۔ انہوں نے کہا کہ فٹسل ایک تیز رفتار کھیل ہے، جو نسبتاً چھوٹے میدان میں 5 کھلاڑیوں کی ٹیموں کے درمیان کھیلا جاتا ہے۔ اس کھیل میں کھلاڑیوں کو فوری فیصلے کرنے ہوتے ہیں اور اپنی تکنیکی صلاحیتوں کا بہترین استعمال کرنا پڑتا ہے۔ انہوں نے کہا کہ یہ لیگ ناگالینڈ کی بیٹیوں کو اپنی صلاحیتوں کے اظہار کا اہم موقع فراہم کر رہی ہے اور خواتین کی کھیلوں میں شرکت کو فروغ دے رہی ہے۔

انہوں نے کہا کہ وزیرِ اعظم تحفظ بیمہ یوجنا ملک کے غریب اور کم آمدنی والے طبقات کو تحفظ فراہم کرنے کا ایک مؤثر ذریعہ بن چکی ہے۔ صرف 20 روپے کے سالانہ پریمیم پر 2 لاکھ روپے کا حادثاتی بیمہ فراہم کرنے والی اس اسکیم سے اب تک 58 کروڑ سے زیادہ افراد مستفید ہو چکے ہیں۔

انہوں نے وزیرِ اعظم جیون جیوتی بیمہ یوجنا کا بھی ذکر کرتے ہوئے کہا کہ یہ اسکیم بھی کروڑوں خاندانوں کو تحفظ فراہم کر رہی ہے۔ صرف 436 روپے کے سالانہ پریمیم پر 2 لاکھ روپے کا زندگی کا بیمہ فراہم کرنے والی اس اسکیم سے اب تک 27 کروڑ سے زیادہ افراد فائدہ اٹھا چکے ہیں۔ وزیرِ اعظم نے عوام سے اپیل کی کہ وہ ان اسکیموں کی معلومات زیادہ سے زیادہ لوگوں تک پہنچائیں۔

وزیرِ اعظم مودی نے مہاراشٹر کے ضلع ناندیڑ کے بہادرپورہ گاؤں کے پیتھکر خاندان کی مثال بھی پیش کی۔ انہوں نے کہا کہ اس خاندان نے شادی کی تقریب کے موقع پر روایتی تحائف دینے کے بجائے گاؤں کے تقریباً ساڑھے 3 ہزار افراد کے لیے حادثاتی بیمہ کرانے کا فیصلہ کیا۔ اس اقدام کے تحت ہر شخص کو 1 لاکھ روپے کا بیمہ تحفظ فراہم کیا گیا۔ وزیرِ اعظم نے کہا کہ یہ پہل سماج کے تئیں ذمہ داری اور حساسیت کی بہترین مثال ہے۔ انہوں نے لوگوں سے اپیل کی کہ وہ اپنی زندگی کے خصوصی مواقع کو سماجی بھلائی سے جوڑیں اور ضرورت مند افراد کی مدد کے لیے آگے آئیں۔

ہندوستھان سماچار

---------------

ہندوستان سماچار / عبدالواحد