ممبئی، 23 جون (ہ س)۔ ہندوستانی محکمہ موسمیات (آئی ایم ڈی) کی جانب سے جاری پیش گوئی کے مطابق مہاراشٹر میں مانسون کے مزید فعال ہونے کے لیے سازگار حالات پیدا ہو گئے ہیں اور 24 سے 27 جون کے دوران کونکن ساحلی پٹی سمیت ریاست کے متعدد اندرونی علاقوں میں بارش کی شدت میں اضافہ ہونے کا امکان ہے۔ ممبئی میں پیر کی صبح سے ہی بارش نے زور پکڑ لیا اور شہر کے بیشتر علاقوں میں مسلسل بارش ریکارڈ کی گئی۔ جنوبی ممبئی کے ساتھ ساتھ مضافاتی علاقوں میں بھی اچھی بارش دیکھی گئی۔بارش کی بڑھتی ہوئی شدت کے پیش نظر علاقائی محکمہ موسمیات کی جانب سے جلد ہی ممبئی میں مانسون کی باضابطہ آمد کا اعلان کیے جانے کا امکان ظاہر کیا جا رہا ہے۔ محکمہ موسمیات نے آئندہ دو سے تین دنوں کے دوران شہر میں اچھی بارش کی پیش گوئی کی ہے، جبکہ جولائی کے پہلے ہفتے میں بھی موسلا دھار بارش ہونے کا امکان ظاہر کیا گیا ہے۔دریں اثنا ممبئی کے سائن علاقے میں صبح کے مصروف اوقات کے دوران ایک بیسٹ بس سڑک پر خراب ہو جانے سے ٹریفک متاثر ہوئی اور طویل ٹریفک جام دیکھنے میں آیا۔ محکمہ موسمیات کے مطابق دن بھر ابر آلود موسم کے ساتھ ہلکی سے درمیانی شدت کی بارش جاری رہ سکتی ہے۔ آئندہ 24 سے 48 گھنٹوں کے لیے ممبئی اور اطراف کے علاقوں میں پیلا الرٹ جاری کیا گیا ہے۔رائے گڑھ ضلع میں بھی صبح سے ابر آلود موسم برقرار ہے اور مانگاؤں، مہسلا، مہاڑ اور پولادپور تعلقوں میں ہلکی بارش ریکارڈ کی گئی۔ ضلع کے لیے ہلکی تا درمیانی بارش کی پیش گوئی کی گئی ہے۔ رتناگیری ضلع کے داپولی تعلقہ میں بھی بالآخر اچھی بارش ہونے سے کسانوں کو بڑی راحت ملی ہے۔ بارش کی کمی کے باعث دھان کی نرسریاں سوکھنے کے دہانے پر پہنچ گئی تھیں اور متعدد دیہات میں پانی کی قلت پیدا ہو گئی تھی، تاہم حالیہ بارش سے دھان کی کاشت کو نئی زندگی ملنے کی امید پیدا ہوئی ہے۔سندھو درگ ضلع میں بھی گزشتہ روز سے بارش سرگرم ہو گئی ہے۔ گزشتہ 24 گھنٹوں کے دوران ضلع میں اوسطاً 80.87 ملی میٹر بارش ریکارڈ کی گئی، جبکہ دیوگڑھ تعلقہ میں سب سے زیادہ 126 ملی میٹر بارش ہوئی۔ آئندہ پانچ دنوں کے دوران درمیانی سے شدید بارش کے امکان کے پیش نظر ضلع کے لیے بھی پیلا الرٹ جاری کیا گیا ہے۔پونے ضلع کے جنّر تعلقہ کے کُمشیت علاقے میں بادل پھٹنے جیسی شدید بارش ریکارڈ کی گئی۔ اس موسلا دھار بارش کے باعث سڑکیں، ندی نالے اور چھوٹے آبی راستے دریا کی شکل اختیار کر گئے، جس سے مقامی معمولاتِ زندگی بری طرح متاثر ہوئے ہیں۔ علاقے میں بڑے پیمانے پر نقصانات کا خدشہ بھی ظاہر کیا جا رہا ہے۔ہندوستھان سماچار

ہندوستان سماچار / جاوید این اے