پیرس،23جون(ہ س)۔امریکہ کے ساتھ مفاہمت کی یاد داشت پر دستخط کے نتیجے میں ایران کچھ پابندیاں اٹھائے جانے کا منتظر ہے۔ ایسے میں فرانسیسی وزارت خارجہ کے ایک ذریعے نے پیر کے روز تصدیق کی ہے کہ فرانس اور یورپی ممالک کی رضامندی کے بغیر ایران پر سے پابندیاں نہیں اٹھائی جا سکتیں۔ذریعے نے واضح کیا کہ اگر کوئی بھی معاہدہ فرانس کے سکیورٹی مفادات سے متصادم ہوا تو فرانسیسی وزارت خارجہ ایران پر سے پابندیاں ہٹانے کی راہ میں رکاوٹ بنے گی۔ اس کے علاوہ فرانس پابندیاں اٹھانے سے قبل ایران کے جوہری پروگرام پر بین الاقوامی نگرانی کی کافی ضمانتیں طلب کرے گا۔فرانسیسی وزارت خارجہ نے امریکی ایرانی معاہدے کو پہلا قدم قرار دیا ہے اور کہا ہے کہ آئندہ کے اقدامات سب سے مشکل ہیں۔ ساتھ ہی اشارہ کیا کہ فرانس خاص طور پر امریکہ کے ساتھ سوئٹزرلینڈ میں تکنیکی مذاکرات میں حصہ لے سکتا ہے۔جہاں تک لبنانی معاملے کا تعلق ہے تو فرانسیسی وزارت خارجہ کو خدشہ ہے کہ یہ امریکہ اور ایران کے درمیان معاہدے کی ناکامی کا سبب بن سکتا ہے۔ اس نے واضح کیا ہے کہ فرانس اپنے شراکت داروں کے ساتھ یونیفل کے متبادل کے طور پر لبنان میں کثیر القومی فورس تعینات کرنے کے امکان پر تبادلہ خیال کرے گا۔

ہندوستھان سماچار

ہندوستان سماچار / Mohammad Khan