جموں, 23 جون (ہ س)جموں ڈیولپمنٹ اتھارٹی (جے ڈی اے) نے جے ڈی اے ہائٹس فیز دوم میں پرسنز ود بینچ مارک ڈس ایبلٹیز (پی ڈبلیو بی ڈی) زمرے کے لیے مختص 2 بی ایچ کے رہائشی فلیٹ کی قرعہ اندازی منعقد کی، جس میں اجے گپتا کامیاب امیدوار قرار پائے۔مارچ 2023 میں مشتہر کردہ ہاؤسنگ اسکیم کے تحت وکاس بھون جموں میں واقع جے ڈی اے کے کانفرنس ہال میں منعقدہ قرعہ اندازی سینئر افسران کی نگرانی میں عمل میں آئی۔ اس موقع پر تمام اہل درخواست دہندگان اور ان کے اہل خانہ بھی موجود تھے۔پی ڈبلیو بی ڈی زمرے کے لیے مختص ایک فلیٹ کے حصول کے لیے اپریل 2023 میں چار امیدواروں نے آن لائن درخواستیں جمع کرائی تھیں، جنہیں مجاز اتھارٹی کی جانچ کے بعد قرعہ اندازی کے لیے اہل قرار دیا گیا۔

اس موقع پر جے ڈی اے کے وائس چیئرمین روپیش کمار نے کہا کہ یہ قرعہ اندازی شفاف اور جوابدہ طرز حکمرانی کی جانب ایک اہم قدم ہے، جس کے ذریعے پی ڈبلیو بی ڈی زمرے سے متعلق ایک طویل عرصے سے زیر التوا معاملے کو حل کیا گیا ہے۔ انہوں نے کہا کہ جے ڈی اے تمام اہل امیدواروں کو مساوی مواقع فراہم کرنے اور عوامی معاملات کو تیز رفتاری سے نمٹانے کے لیے پُرعزم ہے۔قرعہ اندازی میں کامیاب قرار پانے والے اجے گپتا نے اس عمل کو شفاف اور غیر جانبدارانہ قرار دیتے ہوئے جے ڈی اے کا شکریہ ادا کیا اور کہا کہ اس سے عوام کا نظام پر اعتماد مزید مستحکم ہوا ہے۔

ہندوستھان سماچار

---------------

ہندوستان سماچار / محمد اصغر