ممبئی ، 23 جون (ہ س) ۔ مہاراشٹر حکومت نے زرعی شعبے، باغبانی، نامیاتی کھیتی اور زرعی ترقی سے متعلق مختلف سرگرمیوں میں نمایاں خدمات انجام دینے والے کسانوں، خواتین کسانوں، زرعی اداروں اور محکمہ زراعت کے افسران و ملازمین کے لیے سال 2023 اور 2024 کے ریاستی زرعی ایوارڈز کا اعلان کر دیا ہے۔ ان ایوارڈز کے تحت مجموعی طور پر 189 کسانوں، اداروں اور زرعی افسران کو اعزاز سے نوازا جائے گا۔ریاستی وزیر زراعت دتاتریہ بھرنے نے بتایا کہ زراعت کی ترقی اور جدید زرعی طریقوں کے فروغ میں نمایاں کردار ادا کرنے والوں کی حوصلہ افزائی اور ان کی خدمات کے اعتراف کے طور پر یہ ایوارڈز دیے جاتے ہیں۔ انہوں نے کہا کہ ریاستی زرعی ایوارڈز زرعی شعبے میں بہترین کارکردگی کی علامت ہیں اور نئی نسل کو جدید اور پائیدار زراعت کی جانب راغب کرنے میں اہم کردار ادا کرتے ہیں۔ انہوں نے کہا کہ مہاراشٹر کے سابق وزیر اعلیٰ اور ہریت انقلاب کے معمار آنجہانی وسنت راؤ نائک کی یومِ پیدائش کے موقع پر منائے جانے والے یومِ زراعت کی مناسبت سے یکم جولائی 2026 کو ممبئی میں ایک باوقار تقریب منعقد کی جائے گی، جس میں ان ایوارڈز کی تقسیم عمل میں آئے گی۔ وزیر زراعت دتاتریہ بھرنے نے آج ریاستی گورنر جِشنو دیو ورما سے ملاقات کر کے انہیں تقریب میں شرکت کی دعوت دی، جسے گورنر نے قبول کر لیا ہے۔ ایوارڈز کی تقسیم گورنر کے ہاتھوں انجام پائے گی۔ اس موقع پر وزیر اعلیٰ دیویندر فڑنویس، نائب وزرائے اعلیٰ ایکناتھ شندے اور سنیترہ واہنی اجیت دادا پوار بھی موجود رہیں گے۔ ایوارڈ یافتگان کا انتخاب وزیر زراعت دتاتریہ بھرنے کی صدارت میں منعقدہ انتخابی کمیٹی کے اجلاس میں کیا گیا، جسے حکومت نے منظوری دے دی ہے۔ یہ ایوارڈز ہر سال ان افراد اور اداروں کو دیے جاتے ہیں جنہوں نے جدید زرعی ٹیکنالوجی کے استعمال، پیداوار میں اضافہ، پائیدار زراعت، نامیاتی کھیتی، باغبانی اور زرعی توسیعی خدمات کے شعبے میں نمایاں کارکردگی کا مظاہرہ کیا ہو۔وزیر زراعت نے کہا کہ وزیر اعلیٰ دیویندر فڑنویس، نائب وزیر اعلیٰ ایکناتھ شندے اور نائب وزیر اعلیٰ سنیترہ واہنی اجیت دادا پوار کی قیادت میں محکمہ زراعت نے ریاست کے مختلف علاقوں سے بہترین کارکردگی کا مظاہرہ کرنے والے افراد اور اداروں کا انتخاب کیا ہے۔ یکم جولائی 2026 کو سال 2023 اور 2024 کے تمام منتخب ایوارڈ یافتگان کو ایک ہی تقریب میں اعزاز سے نوازا جائے گا۔ انہوں نے کہا کہ جدید ٹیکنالوجی، نامیاتی کھیتی، باغبانی اور پائیدار زرعی ترقی کے فروغ کے لیے کام کرنے والے تمام ایوارڈ یافتگان نے ریاست کے لیے ایک مثالی نمونہ قائم کیا ہے اور وہ مبارکباد کے مستحق ہیں۔اعلان کردہ ایوارڈز میں ڈاکٹر پنجاب راؤ دیشمکھ کرشی رتن ایوارڈ، وسنت راؤ نائک کرشی بھوشن ایوارڈ، جیجا ماتا کرشی بھوشن ایوارڈ، کرشی بھوشن (نامیاتی کھیتی) ایوارڈ، وسنت راؤ نائک شیتی متر ایوارڈ، نوجوان کسان ایوارڈ، اُدیان پنڈت ایوارڈ، وسنت راؤ نائک شیتی نِشٹھ کسان ایوارڈ (عام زمرہ)، وسنت راؤ نائک شیتی نِشٹھ کسان ایوارڈ (قبائلی زمرہ) اور پدم شری ڈاکٹر وٹھل راؤ وکھے پاٹل کرشی سیوا رتن ایوارڈ سمیت متعدد اہم اعزازات شامل ہیں۔حکومت کے مطابق سال 2023 اور 2024 کے لیے مجموعی طور پر 189 ایوارڈ یافتگان کو ان اعزازات سے نوازا جائے گا اور ان کی زرعی شعبے میں خدمات کا سرکاری سطح پر اعتراف کیا جائے گا۔

ہندوستھان سماچار

--------------------

ہندوستان سماچار / جاوید این اے