علی گڑھ، 22 جون (ہ س)۔

علی گڑھ مسلم یونیورسٹی کے مختلف شعبوں، این سی سی یونٹوں اور رہائشی ہالوں میں 12ویں بین الاقوامی یوگا ڈے کے موقع پر ‘‘صحت مند بڑھاپے کے لیے یوگا’’ کے موضوع کے تحت بیداری اور عملی تربیتی پروگرام منعقد کیے گئے۔ بیگم عزیز النساء ہال میں بین الاقوامی یومِ یوگا کی تقریبات کے سلسلے میں اجتماعی یوگا مظاہرہ اور عملی سیشن منعقد کیا گیا۔ پروگرام کا افتتاح کرتے ہوئے پرووسٹ پروفیسر آسیہ سلطانہ نے کہا کہ یوگا ایک ہمہ گیر طرزِ زندگی ہے جو جسم، ذہن اور روح کے درمیان ہم آہنگی پیدا کرتا ہے۔ سیشن کی رہنمائی محترمہ راحیلہ اور محترمہ جگیاسا کوشک نے کی جبکہ ڈاکٹر جیوتی کسمبل نے پروگرام کی نگرانی کی۔ اس موقع پر ڈاکٹر صوفیہ نسیم، ڈاکٹر مشیر، رہائشی طالبات اور عملے کے ارکان نے شرکت کی۔ پروگرام میں یوگا آسن، پرانایام اور مراقبہ کی مختلف تکنیکوں کی مشق کرائی گئی۔

سروجنی نائیڈو ہال میں بھی بین الاقوامی یومِ یوگا 2026 کے موقع پر ‘‘صحت مند بڑھاپے کے لیے یوگا’’ کے موضوع کے تحت یوگا سیشن منعقد کیا گیا۔ یہ پروگرام پرووسٹ پروفیسر عروس الیاس کی سرپرستی میں منعقد ہوا جنہوں نے جسمانی صحت، ذہنی سکون اور صحت مند طرزِ زندگی کے لیے یوگا کی اہمیت پر زور دیا۔ پروگرام کی کوآرڈینیٹر محترمہ ورشا اور شریک کوآرڈینیٹر محترمہ نازیہ بیگم تھیں جبکہ ڈاکٹر محمد اسلم، ڈاکٹر کلیم احمد، ڈاکٹر رقیہ افروز، ڈاکٹر سارہ جاوید اور محترمہ ایمن فہیم نے انتظامی معاونت فراہم کی۔ یوگا سیشن کی قیادت ہال کی رہائشی اور شعبہ فزیکل ایجوکیشن کی طالبہ محترمہ اقرا ناز نے کی، جنہوں نے شرکاء کو مختلف یوگا آسن، سانس کی مشقوں اور مراقبہ کی تکنیکوں سے روشناس کرایا۔ ہال کی رہائشی طالبات اور عملے کے ارکان نے بھرپور شرکت کی جبکہ محترمہ دیکشا سنگھ، محترمہ ویشالی گوسوامی اور محترمہ پونم نے رضاکارانہ خدمات انجام دیں۔ پروگرام میں متوازن اور صحت مند زندگی کے حصول کے لیے یوگا کو معمول کا حصہ بنانے کی اہمیت اجاگر کی گئی۔ ان تمام پروگراموں میں جسمانی تندرستی، ذہنی صحت، جذباتی توازن اور صحت مند بڑھاپے کے فروغ میں یوگا کے کردار کو اجاگر کیا گیا اور شرکاء کو ترغیب دی گئی کہ وہ یوگا کو اپنی روزمرہ زندگی کا مستقل حصہ بنائیں۔

ہندوستھان سماچار

ہندوستان سماچار / سید کامران علی گڑھ