سوہل (جرمنی)، 22 جون (ہ س)۔ بھارت کے 16 سالہ نشانے باز پریتم کیندرے نے بین الاقوامی سطح پر شاندار کارکردگی دکھاتے ہوئے آئی ایس ایس ایف جونیئر ورلڈ چیمپئن شپ 2026 میں مردوں کے 10 میٹر ایئر رائفل مقابلے میں سونے کا تمغہ جیت لیا۔

اپنے صرف دوسرے بین الاقوامی ٹورنامنٹ میں حصہ لیتے ہوئے پریتم نے آٹھ کھلاڑیوں کے فائنل میں نہایت پُرسکون اور شاندار کارکردگی کا مظاہرہ کیا۔ انہوں نے 251.3 پوائنٹس حاصل کر کے پہلی پوزیشن حاصل کی۔ غیر جانب دار کھلاڑی تیموفی ایلینیکوف نے چاندی اور ناروے کے جینس اوسٹلی نے کانسی کا تمغہ جیتا۔

عالمی خطاب جیتنے کے بعد پریتم نے کہا کہ مقابلے کے دوران ان کی پوری توجہ صرف اپنی تکنیک اور ہر شاٹ کو بہتر انداز میں کھیلنے پر مرکوز رہی۔

پریتم نے ایک سرکاری بیان میں کہا، “اس جیت سے میں بے حد خوش ہوں۔ پوری مقابلے کے دوران میری توجہ صرف اپنی تکنیک پر رہی اور ہر شاٹ میں بہترین کارکردگی دکھانے کی کوشش کی۔”

پونے سے تعلق رکھنے والے اس نوجوان نشانے باز نے اپنی کامیابی کا سہرا گگن نارنگ گن فار گلوری شوٹنگ اکیڈمی کو بھی دیا۔

انہوں نے کہا، “اکیڈمی کے کوچز نے مجھے ذاتی طور پر بہت رہنمائی فراہم کی۔ ہماری تیاری ہمیشہ تکنیک کو بہتر بنانے پر مرکوز رہی اور مجھے لگتا ہے کہ یہی اس کامیابی کی سب سے بڑی وجہ بنی۔”

حال ہی میں دسویں جماعت کا امتحان مکمل کرنے والے پریتم نے کہا کہ یہ کامیابی انہیں مستقبل میں مزید بہتر کارکردگی کے لیے تحریک دے گی۔

انہوں نے کہا، “عالمی چیمپئن شپ کا سونے کا تمغہ جیتنے سے میرا اعتماد کافی بڑھ گیا ہے۔ میں 10 میٹر ایئر رائفل میں مسلسل بہتر کارکردگی دکھانا چاہتا ہوں اور آنے والے برسوں میں بھارت کے لیے مزید تمغے جیتنا چاہتا ہوں۔”

آئی ایس ایس ایف جونیئر ورلڈ چیمپئن شپ کا یہ پانچواں ایڈیشن جرمنی کے شہر سوہل میں منعقد ہو رہا ہے، جس میں 70 قومی فیڈریشنز کے 800 سے زائد نشانے باز حصہ لے رہے ہیں۔ بھارت نے اس مقابلے میں 84 رکنی دستہ بھیجا ہے۔

اس سے قبل 2024 میں پیرو کے لیما میں ہونے والی چیمپئن شپ میں بھارت 24 تمغوں (13 سونے، 3 چاندی اور 8 کانسی) کے ساتھ میڈل ٹیبل میں سرفہرست رہا تھا۔

یہ ٹورنامنٹ 26 جون تک جاری رہے گا۔

ہندوستھان سماچار

---------------

ہندوستان سماچار / عبدالواحد