جموں،22 جون (ہ س)۔

ضلع ڈوڈہ میں غیر قانونی کان کنی کے خلاف جاری مہم کے تحت ڈوڈہ پولیس نے ناکہ چیکنگ کے دوران بغیر قانونی دستاویزات کے ریت لے جانے والے ایک ڈمپر کو ضبط کر لیا اور متعلقہ قوانین کے تحت 16,375 روپے جرمانہ عائد کیا گیا۔پولیس ترجمان کے مطابق پولیس پوسٹ کراڑہ کے انچارج اور ان کی ٹیم نے چیکنگ کے دوران ایک ڈمپر کو روک کر تلاشی لی۔ جانچ کے دوران معلوم ہوا کہ گاڑی میں ریت لے جائی جا رہی تھی، تاہم اس کے لیے لازمی ای-چالان/فارم-ایف موجود نہیں تھا۔

پولیس کے مطابق ڈمپر کو فرید احمد ولد بشیر احمد، سکنہ گرمل کاستی گڑھ، ضلع ڈوڈہ چلا رہا تھا۔ ضابطے کی خلاف ورزی سامنے آنے پر گاڑی کو ضبط کر لیا گیا اور مزید کارروائی کے لیے ضلع معدنیات افسر (ڈی ایم او) ڈوڈہ کو مطلع کیا گیا۔بعد ازاں متعلقہ دفعات کے تحت گاڑی پر 16,375 روپے کا جرمانہ عائد کیا گیا۔ ڈوڈہ پولیس نے کہا ہے کہ قدرتی وسائل کے تحفظ اور غیر قانونی کان کنی کی روک تھام کے لیے ایسی کارروائیاں آئندہ بھی جاری رکھی جائیں گی۔

ہندوستھان سماچار

ہندوستان سماچار / محمد اصغر