کولکاتا، 22 جون (ہ س)۔ مغربی بنگال میں بھارتیہ جنتا پارٹی (بی جے پی) حکومت نے پیر کو مالی سال 2026تا2027 کے لئے 4.38 لاکھ کروڑ کا بجٹ پیش کیا۔ وزیر اعلی شبھیندو ادھیکاری نے بجٹ کو تاریخی قرار دیتے ہوئے کہا کہ یہ بنگال کی کھوئی ہوئی ثقافت اور وقار کو بحال کرنے کی کوشش ہے۔

بجٹ پیش کیے جانے کے بعد بھارتیہ جنتا پارٹی کے ریاستی ہیڈکوارٹر میں منعقدہ ایک پریس کانفرنس سے خطاب کرتے ہوئے، وزیر اعلی شبھیندو ادھیکاری نے کہا کہ اگرچہ اسے مکمل بجٹ کہا جا سکتا ہے، لیکن ان کی حکومت کے دور کو دیکھتے ہوئے یہ دراصل آٹھ ماہ کا بجٹ ہے۔ انہوں نے کہا کہ بجٹ کا مقصد ریاست کی آمدنی اور اخراجات کے درمیان توازن برقرار رکھنا اور پانچ اہم شعبوں کو مضبوط کرنا ہے، جن میں سروس پاور، انڈسٹری پاور اور نالج پاور شامل ہیں۔

وزیراعلیٰ شبھیندو نے کہا کہ بجٹ میں مغربی بنگال کی وراثت، ثقافت اور شاندار شناخت کو بحال کرتے ہوئے موجودہ ضروریات پر خصوصی توجہ دی گئی ہے۔ انہوں نے روزگار کے مواقع پیدا کرنے کے لیے سہ رخی یا سہ شکتی اسکیم کو بجٹ کا ایک اہم ستون قرار دیا۔ انہوں نے کہا کہ مختلف محکموں میں 100,000 نئی تقرریاں کی جائیں گی۔ اس میں 20,000 پولیس اہلکاروں اور 50,000 اساتذہ، پروفیسرز اور تعلیمی اہلکاروں کی تقرری شامل ہے۔ بقیہ 30,000 آسامیاں مختلف سرکاری محکموں میں کنٹریکٹ ورکرز اور ڈیٹا انٹری اہلکاروں سے پ±ر کی جائیں گی۔ انہوں نے کہا کہ بھرتی کے عمل میں کوئی سیاسی شخص شامل نہیں ہوگا اور یونین پبلک سروس کمیشن جیسا شفاف نظام اپنایا جائے گا۔

وزیراعلیٰ نے کہا کہ فوڈ پروسیسنگ اور نجی صنعت اور سرمایہ کاری کے لیے مائیکرو، اسمال اور میڈیم انٹرپرائز سیکٹر پر خصوصی زور دیا گیا ہے۔ 100 کروڑ روپے سے زیادہ کی سرمایہ کاری کرنے والی صنعتوں کو پنچایتوں یا مقامی اداروں سے علیحدہ اجازت کی ضرورت نہیں ہوگی۔ مقصد یہ ہے کہ سنگل ونڈو سسٹم کے ذریعے سرمایہ کاری کی منظوری دے کر اور رنگداری، سنڈیکیٹس اور کٹوتی کے رواج کو ختم کرکے کاروبار کے لیے سازگار ماحول پیدا کرنا ہے۔ پچھلی حکومت کی طرف سے بند کی گئی مراعاتی اسکیم کو دوبارہ شروع کرنے کے لیے 5,000 کروڑ روپے کا انتظام کیا گیا ہے۔

شبھیندو ادھیکاری نے کہا کہ ریاستی حکومت چھوٹے اور درمیانے درجے کے کاروباریوں کو پردھان منتری مدرا یوجنا، پردھان منتری روزگار سریجن کاریاکرم، اور وشوکرما یوجنا کے ذریعے گرانٹ امداد فراہم کرنے میں اہم کردار ادا کرے گی۔ دھان کی خریداری پر کسانوں کے لیے2,500 کے علاوہ 200 روپے فی کوئنٹل سبسڈی کا اعلان کیا گیا ہے۔ اسے مرحلہ وار انداز میں 3,100 روپے تک بڑھایاجائے گا۔ پردھان منتری کسان سمان ندھی کے تحت مرکزی حکومت کی طرف سے فراہم کردہ 6,000 روپے کے علاوہ ریاستی حکومت 3000روپے دے گی۔

انہوں نے کہا کہ آلو کے کاشتکاروں کے لیے خصوصی پیکج، کولڈ اسٹوریج تک نقل و حمل پر سبسڈی اور زرعی مقاصد کے لیے استعمال ہونے والی بجلی پر 2 روپے فی یونٹ کی رعایت کا بھی اعلان کیا گیا ہے۔ اس بجلی سبسڈی کے لیے ریاستی حکومت 800 کروڑ روپے خرچ کرے گی۔ خواتین کے لیے اناپورنا یوجنا کے تحت 28 لاکھ مستفیدین تک 3,000 روپے کی امداد کا دعویٰ کیا گیا ہے۔ وزیراعلیٰ نے کہا کہ یکم جولائی سے ایک کرور پانچ لاکھ اضافی خواتین کے کھاتوں میں امداد منتقل کی جائے گی۔ اس اسکیم کے لیے 36,000 کروڑ روپے کا انتظام کیا گیا ہے۔ کالج اور یونیورسٹی کی سطح پر طالبات کو اسکول چھوڑنے سے روکنے کے لیے 50,000 روپے کی یک وقتی امداد فراہم کی جائے گی۔

وزیر اعلیٰ نے کہا کہ ریاستی حکومت مرکزی حکومت کی طرف سے فراہم کردہ پردھان منتری ماترو وندنا یوجنا کے تحت 5,000کے علاوہ حکومت اضافی 16,000 روپے فراہم کرے گی۔ یہ اہل خواتین کو کل 21,000 روپے اور پانچ غذائی کٹس فراہم کرے گا۔ خواتین کی حفاظت کے لیے گلابی کارڈ متعارف کرایا جائے گا، سرکاری بسوں میں مفت سفر کی سہولت فراہم کی جائے گی۔ خواتین پولیس اہلکاروں پر مشتمل دو نئی درگا دستہ بٹالین بھی بنائی جائیں گی۔ پہاڑی علاقوں میں ایسٹرن فرنٹیئر رائفلز میں 1,000 نئی تقرریاں کی جائیں گی جن میں سے 30 فیصد اسامیاں خواتین کے لیے مختص ہوں گی۔ انہوں نے کہا کہ 2016 سے 2019 تک کے سرکاری ملازمین کے زیر التواء واجبات کا ایک اہم حصہ کلیئر کر دیا گیا ہے، اور باقی رقم فنڈز دستیاب ہوتے ہی جاری کر دی جائے گی۔

انہوں نے کہا کہ ساتویں تنخواہ کمیشن کی تشکیل کے لیے ایک کمیٹی تشکیل دی گئی ہے اور اس کی رپورٹ دسمبر تک متوقع ہے، جس سے جنوری سے اس پر عمل درآمد ممکن ہو گا۔ وزیر اعلیٰ نے کہا کہ اکتوبر سے گریجویٹ بے روزگار افراد کو ماہانہ 3,000 روپے اور نان گریجویٹ بے روزگار افراد کو 2,000 روپے ماہانہ الاو¿نس ملے گا۔ اس کے لیے شرط یہ ہے کہ خاندان کی ماہانہ آمدنی 100,000 سے کم ہونی چاہیے۔ صحت کے شعبے میں، سرکاری اسپتالوں میں مریضوں کے کھانے پر یومیہ اخراجات کو 56 روپے سے بڑھا کر 110 روپے کر دیا گیا ہے۔ دوپہر کے کھانے کے لیے فی طالب علم مختص 6.50 سے بڑھا کر 10 کر دیا گیا ہے۔ تمام ہائی اسکولوں اور خواتین کے کالجوں میں سینیٹری نیپکن تقسیم کرنے والی مشینیں نصب کی جائیں گی۔ دوپہر کے کھانے کے باورچیوں کے لیے 100فیصد گیس کی فراہمی کا بھی اعلان کیا گیا ہے۔ کولکاتا میں ایک پائلٹ پروجیکٹ کے طور پر، انٹرنیشنل سوسائٹی فار کرشنا کانشسنس کو دوپہر کے کھانے کی تیاری کی ذمہ داری سونپی جائے گی۔ وزیر اعلیٰ نے کہا کہ امن و امان کو مضبوط بنانے کے لیے درگا پوجا سے قبل 16,000 نئے کانسٹیبلوں کو تعینات کیا جائے گا۔

وزیر اعلیٰ شبھیندو نے کہا کہ بجٹ میں سڑکوں، پلوں، ریلوے، ہوائی اڈوں اور بندرگاہوں کی تعمیر کے ذریعے رابطے کو بہتر بنانے پر بھی زور دیا گیا ہے۔ پانچ بڑے پلوں کی تعمیر کے لیے 100 کروڑ روپے مختص کیے گئے ہیں، جن میں ہلدیہ-نندیگرام، ساگر آئی لینڈ، بیر بھوم اور درگاپور-بانکورہ شامل ہیں۔ مالدہ اور جنوبی دیناج پور میں کٹاو کو روکنے کے لیے بڑے پروجیکٹوں کا بھی اعلان کیا گیا ہے۔ انہوں نے کہا کہ تمام برادریوں کی ثقافت کی حفاظت، قبائلی بہبود، دھرتی ابا یوجنا، ایکلویہ ودیالیہ اور قبائلی یونیورسٹی جیسے اقدامات کے ذریعے ریاست کی شاندار شناخت کو بحال کرنے کی کوشش کی جائے گی۔

---------------

ہندوستان سماچار / عبدالسلام صدیقی