یوٹیوب سے منصوبہ بنا کر گھر سے نکلنے والی 4 طالبات ورنداون سے بحفاظت برآمد

علی گڑھ، 22 جون (ہ س)۔

اترولی کے گاؤں احمدپورہ سے تعلق رکھنے والی 13 سے 14 سال عمر کی 4 طالبات گھر والوں کی ناراضی سے دلبرداشتہ ہو کر گھر چھوڑ کر چلی گئیں۔ ساتویں، آٹھویں، نویں اور دسویں جماعت میں زیر تعلیم ان طالبات نے یوٹیوب ویڈیوز کی مدد سے دہلی جانے، خریداری کرنے اور متھرا-ورنداون گھومنے کا منصوبہ بنایا تھا۔

ہفتہ کی دوپہر تقریباً 12:30 بجے چاروں طالبات گھر سے نکل گئیں، جن میں 2 سگی بہنیں بھی شامل تھیں۔ اہل خانہ نے تلاش کے بعد رات 8 بجے پولیس کو اطلاع دی، جس پر فوری کارروائی کرتے ہوئے 5 خصوصی ٹیمیں تشکیل دی گئیں۔

پولیس نے علی گڑھ، دہلی اور متھرا کے راستوں پر 300 سے زائد سی سی ٹی وی کیمروں کی جانچ کی اور موبائل کال ریکارڈز کی مدد سے تفتیش آگے بڑھائی۔ تحقیقات میں معلوم ہوا کہ طالبات پہلے گاندھی پارک بس اڈے سے دہلی گئیں، جہاں انہوں نے سروجنی نگر مارکیٹ میں خریداری کی۔ بعد ازاں وہ بس کے ذریعے ورنداون روانہ ہوگئیں۔

اتوار کی صبح تقریباً 5 بجے ورنداون پہنچنے کے بعد طالبات نے ایک گیسٹ ہاؤس میں کمرہ لینے کی کوشش کی، جہاں سے ان کا سراغ ملا۔ پولیس نے تقریباً 15 گھنٹے کی مسلسل کوشش کے بعد چاروں طالبات کو بحفاظت برآمد کرکے اہل خانہ کے حوالے کر دیا۔

ایس ایس پی نیرج کمار جادون نے بتایا کہ طالبات نے اعتراف کیا کہ وہ گھر والوں کی ڈانٹ ڈپٹ سے پریشان تھیں، اسی لیے گھر چھوڑ کر چلی گئی تھیں۔ انہوں نے کہا کہ اس کامیاب کارروائی میں شامل پولیس ٹیم کو 25 ہزار روپے انعام دیا جائے گا۔

ایس ایس پی نے والدین سے اپیل کی کہ وہ اپنے بچوں کے ساتھ دوستانہ رویہ اختیار کریں، ان کے مسائل سنیں اور ان کی رہنمائی کریں تاکہ ایسے واقعات سے بچا جا سکے۔

ہندوستھان سماچار

ہندوستان سماچار / سید کامران علی گڑھ