واشنگٹن، 22 جون (ہ س)۔ امریکی صدر ڈونلڈ ٹرمپ نے ملک کے ہتھیاروں اور فوجی ساز و سامان کے ذخیرے کو تقویت دینے کے لیے ڈیفنس پروڈکشن ایکٹ (ڈی پی اے ) کو نافذ کر دیا ہے۔ یہ اقدام ایران کے ساتھ طویل تنازعات اور دیگر عالمی بحرانوں کی وجہ سے امریکی ہتھیاروں میں کمی کے بڑھتے ہوئے خدشات کے درمیان سامنے آیا ہے۔

گزشتہ11 جون کو جاری کردہ ایک میمو میں، ٹرمپ نے وزیر دفاع پیٹ ہیگستھ کو ہدایت دی کہ وہ دفاعی پیداوار میں حائل رکاوٹوں کو دور کریں اور فوجی صنعت کے ساتھ نئے معاہدے کریں۔ دفاعی پیداوار ایکٹ صدر کو قومی سلامتی کے لیے ضروری سمجھے جانے والے سامان اور ہتھیاروں کی تیاری کو ترجیح دینے کا اختیار دیتا ہے۔

دریں اثناء چین اور پاکستان نے مشرق وسطیٰ میں امن کی کوششوں کو آگے بڑھانے پر زور دیا ہے۔ چینی وزیر خارجہ وانگ ایئی اور پاکستانی نائب وزیر اعظم و وزیر خارجہ محمد اسحاق ڈار کے درمیان ٹیلی فون پر ہوئی بات چیتمیں امریکہ ایران معاہدے اور علاقائی صورتحال پر تبادلہ خیال کیا گیا۔

چین کی وزارت خارجہ کے مطابق دونوں ممالک نے جنگ بندی، امن مذاکرات کی بحالی، سمندری تجارتی راستوں کی حفاظت اور اقوام متحدہ کے کردار کو مضبوط بنانے کی حمایت کی۔ چین نے پاکستان کے ساتھ اسٹریٹجک تعاون بڑھانے اور خطے میں امن کے قیام کے لیے مل کر کام کرنے کا عہد کیا۔

ادھر ایران نے جنوبی لبنان میں حالیہ حملوں کے بعد اسرائیل کو فوجی جواب دینے کی دھمکی دی ہے۔ ایرانی ملٹری کمانڈ نے الزام لگایا کہ اسرائیل نے بار بار جنگ بندی معاہدے کی خلاف ورزی کی ہے اور اگر حملے بند نہ ہوئے تو وہ سخت جواب دے گا۔

تجزیہ کاروں کا خیال ہے کہ ایران کے ساتھ تقریباً 15 ہفتے کے تنازعے اور دیگر فوجی کارروائیوں نے امریکہ کو اپنے ہتھیاروں اور میزائلوں کے ذخیرے کو بھرنے پر مجبور کیا ہے۔ نتیجتاً، ٹرمپ انتظامیہ ملکی دفاعی پیداواری صلاحیت بڑھانے اور اتحادیوں کو فوجی سپلائی محدود کرنے کی پالیسی پر غور کر رہی ہے۔

امریکی کانگریس اہم میزائل سسٹمز اور دفاعی آلات کی پیداوار کو بڑھانے کے لیے اضافی مالی معاونت اور طویل مدتی معاہدوں کی منظوری کے لیے بھی کام کر رہی ہے۔ ماہرین کا خیال ہے کہ اس اقدام سے مستقبل میں ممکنہ سکیورٹی چیلنجوں سے نمٹنے کے لیے امریکہ کی فوجی تیاریوں کو تقویت ملے گی۔

ہندوستھان سماچار

ہندوستان سماچار / محمد شہزاد