نئی دہلی، 21 جون (ہ س):۔

مانسون کی آمد سے قبل دہلی کی سڑکوں کو محفوظ اور ہموار بنانے کے مقصد سے، محکمہ تعمیرات عامہ (پی ڈبلیو ڈی) نے آج دارالحکومت بھر میں گڑھوں کی مرمت کی خصوصی مہم شروع کی۔ انجینئرز، فیلڈ اسٹاف اور مینٹیننس ٹیموں کو مختلف علاقوں میں تعینات کیا گیا تاکہ نشانزد گڑھوں کی بروقت مرمت کو یقینی بنایا جا سکے۔

دہلی حکومت میں محکمہ تعمیرات عامہ کے وزیر پرویش صاحب سنگھ نے مرمت کے کام کا معائنہ کرنے اور مہم کی پیشرفت کا جائزہ لینے کے لیے ذاتی طور پر مختلف مقامات کا دورہ کیا۔ اتوار کا دن ہونے کے باوجود محکمہ کے افسران اور ملازمین دن بھر فیلڈ میں موجود رہے اور مقررہ مدت میں کام مکمل کرنے کے لیے کوشاں رہے۔

محکمانہ اعداد و شمار کے مطابق، یکم جنوری سے 4 جون کے درمیان پی ڈبلیو ڈی سڑکوں پر کل 14,757 گڑھوں کی نشاندہی کی گئی تھی، جن میں سے 12,762 گڑھوں کی مرمت پہلے ہی کر دی گئی تھی۔ مانسون سیزن سے پہلے باقی شناخت شدہ کاموں کو مکمل کرنے کے لیے آج ایک خصوصی مہم شروع کی گئی، جس میں دارالحکومت بھر میں 2,000 سے زیادہ گڑھوں کی مرمت کا ہدف رکھا گیا۔

معائنہ کے دوران، وزیر پرویش صاحب سنگھ نے کہا، پبلک ورکس ڈپارٹمنٹ (پی ڈبلیو ڈی) سڑکوں کی دیکھ بھال اور گڑھوں سے متعلق شکایات کو دور کرنے کے لیے سال بھر تندہی سے کام کرتا ہے۔ ہماری کوشش ہے کہ مانسون کے موسم سے پہلے دہلی کی سڑکیں بہترین حالت میں ہوں۔ آج کی خصوصی مہم اس عزم کا ثبوت ہے۔ دارالحکومت میں 2,000 سے زیادہ گڑھوں کی مرمت کو یقینی بنایا گیا ہے۔

یہ خصوصی مہم دہلی حکومت کی مانسون سے پہلے کی جامع تیاریوں کا حصہ ہے، جس کا مقصد سڑکوں کے حالات کو بہتر بنانا، مسافروں کی حفاظت کو یقینی بنانا، اور دارالحکومت کو بہتر، پائیدار، اور شہریوں پر مبنی بنیادی ڈھانچہ فراہم کرنا ہے۔

ہندوستھان سماچار

ہندوستان سماچار / عطاءاللہ