جھانسی، 21 جون (ہ س)۔ جھانسی کے قیام کے دوسرے دن 12ویں بین الاقوامی یوگا ڈے کے موقع پر اتوار کو ضلع انتظامیہ اور آیوش محکمے کے مشترکہ زیراہتمام تاریخی جھانسی قلعے کے دامن میں منعقدہ شاندار پروگرام میں وزیر اعلیٰ یوگی آدتیہ ناتھ نے ہزاروں لوگوں کے ساتھ یوگا کی مشق کی۔ اس دوران انہوں نے یوگا کو صحت مند اور متوازن زندگی کی بنیاد بتاتے ہوئے سب سے اسے اپنے روزمرہ کے معمولات کا حصہ بنانے کی اپیل کی۔

وزیر اعلیٰ نے کہا کہ یوگا صرف ورزش نہیں بلکہ جسم، دماغ اور روح کو متوازن رکھنے کی ہندوستانی روایت ہے۔ انہوں نے کہا، ’’ہمیں باقاعدہ یوگا کو اپنی زندگی کا حصہ بنانا ہوگا۔ جس کے پاس یوگا سے تپا ہوا جسم ہے، وہاں نہ تو بیماری ہوتی ہے اور نہ ہی بڑھاپا جلدی آتا ہے۔ ان مسائل سے بچنے کے لیے یوگا کو اپنے معمولات میں شامل کرنا ضروری ہے۔‘‘

اپنے خطاب میں وزیر اعلیٰ نے سورج کی اہمیت پر روشنی ڈالتے ہوئے کہا کہ سورج ہم سب کی زندگی اور توانائی کا اہم ذریعہ ہے۔ سال میں دو بار ہونے والی درگا پوجا (انوشٹھان) بھی توانائی کی عبادت کے اہم دور ہوتے ہیں۔ انہوں نے کہا کہ یوگا ڈے کا مقصد سورج کی توانائی کو خود میں جذب کر کے زندگی کو نئی سمت دینا ہے۔ یوگا کی روایت آدِ یوگی بھگوان شیو کے زمانے سے چلی آ رہی ہے اور یہ ہندوستان کے قدیم ثقافتی ورثے کا اہم حصہ ہے۔

وزیر اعلیٰ یوگی آدتیہ ناتھ نے وزیر اعظم نریندر مودی کی کوششوں کی ستائش کرتے ہوئے کہا کہ ان کی قیادت میں یوگا کو عالمی سطح پر پہچان ملی ہے۔ آج پوری دنیا یوگا کو اپنا کر صحت مند زندگی کی طرف بڑھ رہی ہے۔ اس سے ہندوستان کی ثقافت، روایت اور وراثت کو عالمی اسٹیج پر احترام ملا ہے اور 140 کروڑ ہندوستانیوں کے وقار میں اضافہ ہوا ہے۔ انہوں نے کہا کہ ترقی یافتہ ہندوستان کے عزم کو پورا کرنے کی سمت میں یہ ایک اہم اقدام ثابت ہوا ہے۔

اس دوران صبح 6 سے 8 بجے تک انہوں نے لوگوں کے ساتھ یوگا کے مختلف آسنوں کی مشق بھی کی۔

پروگرام میں اتر پردیش قانون ساز کونسل (ودھان پریشد) کے چیئرمین مانویندر سنگھ، وزیر برائے آیوش دیا شنکر مشرا ’دیالو‘، رکنِ پارلیمنٹ انوراگ شرما، رکنِ اسمبلی روی شرما، ایم ایل سی رما نرنجن، رام تیرتھ سنگھل، رکنِ اسمبلی راجیو سنگھ ’پریچھا‘، بی جے پی کے دونوں ضلع صدور سمیت کئی عوامی نمائندے، عہدیداران اور کارکنان موجود رہے۔ اگرچہ وزیر اعلیٰ نے اپنے خطاب میں زیادہ تر عوامی نمائندوں کے نام لیے، لیکن ایک ایم ایل سی کا نام شامل نہ ہونے کی بحث پروگرام کے بعد سیاسی حلقوں میں ہوتی رہی۔

جھانسی قلعے میں منعقدہ اس یوگا پروگرام میں بڑی تعداد میں شہریوں، نوجوانوں اور خواتین نے بھی حصہ لیا اور یوگا کے ذریعے صحت مند زندگی گزارنے کا عزم کیا۔

ہندوستھان سماچار

---------------

ہندوستان سماچار / انظر حسن