علی گڑھ, 21 جون (ہ س)۔

12ویں بین الاقوامی یومِ یوگا کے موقع پر ’’یوگا فار ہیلتھی ایجنگ‘‘ کے عنوان سے اہلیہ بائی ہولکر اسٹیڈیم میں ایک شاندار یوگا پروگرام کا انعقاد کیا گیا۔ تقریب میں اتر پردیش کے وزیر برائے بنیادی تعلیم سندیپ سنگھ نے عوامی نمائندوں، افسران اور بڑی تعداد میں موجود شہریوں کے ساتھ اجتماعی یوگا کرتے ہوئے اس کی اہمیت پر روشنی ڈالی۔

اس موقع پر وزیر تعلیم سندیپ سنگھ نے کہا کہ یوگا بھارت کا ایک بیش بہا ثقافتی ورثہ ہے، جو ہمیں صحت مند، متوازن اور باوقار زندگی گزارنے کا راستہ دکھاتا ہے۔ انہوں نے کہا کہ یوگا کی روایت صدیوں پرانی ہے اور آج پوری دنیا کو صحت و تندرستی کا پیغام دے رہی ہے۔ انہوں نے عوام سے اپیل کی کہ یوگا کو اپنی روزمرہ زندگی کا لازمی حصہ بنائیں۔

انہوں نے خوشی کا اظہار کرتے ہوئے بتایا کہ اس سال بین الاقوامی یومِ یوگا کے موقع پر اتر پردیش کے ہر ضلع، ہر محکمہ اور ہر ادارے میں یوگا پروگراموں کا انعقاد کیا گیا۔ عوام میں بیداری پیدا کرنے اور یوگا کو گھر گھر تک پہنچانے کے لیے وسیع پیمانے پر مہم چلائی گئی۔ انہوں نے بتایا کہ محکمہ بنیادی تعلیم کے تحت ریاست کے تقریباً 32 ہزار پریشدی اسکولوں کے طلبہ، طالبات اور اساتذہ کو بھی یوگا پروگراموں سے جوڑا گیا ہے۔

تقریب سے خطاب کرتے ہوئے مقررین نے ’’یوگا فار ہیلتھی ایجنگ‘‘ کے موضوع پر روشنی ڈالتے ہوئے کہا کہ بڑھتی عمر کے باوجود باقاعدہ یوگا اور متوازن طرزِ زندگی اختیار کرکے انسان طویل عرصے تک صحت مند، فعال اور خود مختار رہ سکتا ہے۔ یوگا جسمانی اور ذہنی توازن قائم کرکے زندگی کو زیادہ آسان، خوشگوار اور پُرجوش بناتا ہے۔

علاقائی آیورویدک و یونانی افسر ڈاکٹر نریندر کمار نے مہمانوں کا گلدستے اور یادگاری تحائف پیش کرکے استقبال کیا۔ اس سے قبل وزیر تعلیم سمیت دیگر معزز شخصیات نے آروگیہ کے دیوتا بھگوان دھنونتری کے مجسمے پر گلپوشی اور چراغ روشن کرکے پروگرام کا افتتاح کیا۔

اس موقع پر رکن پارلیمان ستیش گوتم، رکن قانون ساز کونسل ڈاکٹر مانویندر سنگھ، پروفیسر طارق منصور، ایم ایل اے انیل پراشر، ایم ایل اے راج کمار سہیوگی، ضلع پنچایت صدر وجے سنگھ، بی جے پی ضلع صدر کرشن پال سنگھ، میئر پرشانت سنگھل، ضلع مجسٹریٹ اویناش کمار، چیف ڈیولپمنٹ آفیسر یوگیندر کمار سمیت مختلف محکموں کے افسران اور بڑی تعداد میں شہری موجود تھے۔ پتنجلی یوگ پیٹھ کے روی کر آریہ اور ان کی ٹیم نے یوگا سیشن کی رہنمائی کی۔

---------------

ہندوستان سماچار / سید کامران علی گڑھ