پونے، 16 جون (ہ س)۔خواتین کو بااختیار بنانے کے لیے متعدد قوانین میں تبدیلیاں کی گئی ہیں، تاہم ان قوانین پر مؤثر عمل درآمد اور ان کی معلومات خواتین تک پہنچانا آج کی ایک بڑی ضرورت ہے۔ اس کے ساتھ ہی قانون سازی اور سماجی تبدیلی میں خواتین کے تاریخی کردار کو نئی نسل تک پہنچانا بھی ضروری ہے۔ یہ بات شیوسینا کی سینئر رہنما اور سابق نائب چیئرپرسن قانون ساز کونسل ڈاکٹر نیلم گورے نے کہی۔ مہاراشٹر ساہتیہ پریشد، پونے کی جانب سے منعقدہ تقریب میں ’’قانون سازی میں خواتین کا کردار‘‘ نامی کتاب کی مصنفہ ودیا دیودھر کو شن۔ نا۔ جوشی ایوارڈ سے نوازا گیا۔ ایوارڈ ڈاکٹر نیلم گورے کے ہاتھوں پیش کیا گیا۔ اس موقع پر مہاراشٹر ساہتیہ پریشد کے صدر یوگیش سومن، ڈاکٹر سواتی مہالنک، سونیترا منکنی، ایڈوکیٹ پرارتھنا سداورتے، منگلا گوڈبولے، انجلی کلکرنی سمیت ادب، سماج اور سیاست سے وابستہ شخصیات موجود تھیں۔اپنے خطاب میں ڈاکٹر گورہے نے کہا کہ ملک بھر کی خواتین کا سوانحی انسائیکلوپیڈیا تیار کرنے کا ودیا دیودھر کا عزم انتہائی قیمتی ثابت ہوگا۔ انہوں نے کہا کہ ستی اور کم عمری کی شادی جیسی سماجی رکاوٹوں کے باوجود اہلیہ بائی ہولکر نے ستی ہونے کے بجائے ریاست کی ذمہ داری سنبھالی اور عوامی فلاح و بہبود پر مبنی حکمرانی کی مثال قائم کی، جو آج بھی مشعلِ راہ ہے۔انہوں نے کہا کہ سماجی، سیاسی اور آزادی کی تحریکوں میں خواتین کا کردار نہایت اہم رہا ہے، لیکن آج بھی کئی شعبوں میں خواتین پیچھے نظر آتی ہیں، جس کی ایک بڑی وجہ مردانہ بالادستی پر مبنی سماجی سوچ ہے۔ اگرچہ گزشتہ برسوں میں خواتین کے حقوق کے لیے کئی قانونی اصلاحات کی گئی ہیں، تاہم ان قوانین کے بارے میں وسیع پیمانے پر بیداری پیدا کرنا ضروری ہے۔ ڈاکٹر گورہے کے مطابق خواتین نے اعلیٰ تعلیم اور مختلف شعبوں میں نمایاں کامیابیاں حاصل کی ہیں، لیکن خواتین سے متعلق قوانین کے نفاذ کے لیے قائم ادارے اب بھی کمزور ہیں۔ نئی نسل کو سابقہ نسلوں کی جدوجہد، تاریخ اور خدمات سے آگاہ کرنا وقت کی اہم ضرورت ہے۔ انہوں نے خواتین کو بیدار کرنے والی معلومات سوشل میڈیا کے ذریعے وسیع پیمانے پر پہنچانے پر بھی زور دیا۔انہوں نے کہا کہ خواتین ارکانِ اسمبلی کے لیے دورانِ زچگی رخصت کی سہولت کا معاملہ بھی انہوں نے قانون ساز اداروں کے سامنے رکھا ہے، کیونکہ اس موضوع پر پہلے سنجیدگی سے غور نہیں کیا گیا تھا۔ ان کے مطابق خواتین متاثرین کے تجربات نے بھی کئی اہم قوانین کی تشکیل میں بنیادی کردار ادا کیا ہے۔ ڈاکٹر گورہے نے مزید بتایا کہ خواتین کی تنظیموں کے ذریعے سیلف ہیلپ گروپس، قانونی امداد اور خواتین کو قوانین سے حاصل ہونے والے فوائد پر بحث و مباحثہ ضروری ہے۔ انہوں نے کہا کہ قانون سازی میں معاشرے اور حکومت دونوں کا کردار اہم ہوتا ہے۔ ریاستی حکومت جلد ہی ’’تنہا خواتین پالیسی‘‘ نافذ کرنے جا رہی ہے۔انہوں نے امید ظاہر کی کہ وزیر اعظم نریندر مودی کی جانب سے پیش کردہ ’’نمو شکتی وندن بل‘‘ مستقبل میں عملی شکل اختیار کرے گا، جو خواتین کی سیاسی نمائندگی کے لیے ایک اہم سنگ میل ثابت ہوگا۔ ساتھ ہی انہوں نے سابق وزیر اعلیٰ ایکناتھ شندے حکومت کے اس فیصلے کو بھی سراہا جس کے تحت نام میں والدہ کا نام شامل کرنے کی اجازت دی گئی، جس سے خواتین کے وقار میں اضافہ ہوا۔ پونے کے حوالے سے بات کرتے ہوئے ڈاکٹر گورہے نے کہا کہ مقامی شہریوں کے تحفظ کے لیے ’’محفوظ اور محتاط پونے‘‘ کے نام سے ایک پلیٹ فارم شروع کرنے پر غور کیا جا رہا ہے۔ایوارڈ قبول کرتے ہوئے ودیا دیودھر نے کہا کہ کتاب کی تیاری کے دوران انہیں قانون سازی میں خواتین کے تاریخی کردار کا گہرائی سے مطالعہ کرنے کا موقع ملا۔ انہوں نے کہا کہ آزادی سے قبل بھی خواتین نے قانون، انتظامیہ اور حکمرانی میں اہم کردار ادا کیا تھا۔ انہوں نے ’’خواتین سوانحی انسائیکلوپیڈیا‘‘ تیار کرنے کے عزم کا بھی اظہار کیا، جس میں دنیا بھر کی خواتین کی خدمات کو شامل کیا جائے گا۔تقریب میں ڈاکٹر سواتی مہالنک نے خواتین میں قانونی شعور بیدار کرنے کے لیے اجتماعی کوششوں کی ضرورت پر زور دیا، جبکہ ایڈوکیٹ پرارتھنا سداورتے نے کہا کہ اس کتاب میں بھارتی قانون سازی کے عمل میں خواتین کے کردار کا تفصیلی جائزہ پیش کیا گیا ہے۔ہندوستھان سماچار

ہندوستان سماچار / جاوید این اے