جیوتی نے 100 بین الاقوامی مقابلے مکمل کیے، ہاکی انڈیا نے مبارکباد دی

آکلینڈ، 16 جون (ہ س)۔ ہندوستان کی خاتون ہاکی ٹیم کی مڈ فیلڈ کھلاڑی جیوتی نے منگل کے روز نیوزی لینڈ میں کھیلے گئے ایف آئی ایچ خاتون ہاکی نیشنز کپ کے مقابلے میں جاپان کے خلاف اترتے ہی اپنے کریئر کا 100 واں بین الاقوامی مقابلہ مکمل کر کے ایک اہم کامیابی حاصل کر لی۔ اس موقع پر ہاکی انڈیا نے انہیں مبارکباد دیتے ہوئے ان کی خدمات کی ستائش کی۔

ہریانہ کی رہنے والی جیوتی نے سال 2019 میں ملائیشیا کے خلاف دوطرفہ ٹیسٹ سیریز کے دوران بین الاقوامی ڈیبیو کیا تھا۔ اپنی محنت، ڈسپلن اور مڈ فیلڈ میں پرسکون اور موثر کھیل کے دم پر انہوں نے ہندوستانی ٹیم میں اپنی الگ شناخت قائم کی۔ اس بین الاقوامی کریئر کے دوران جیوتی کئی بڑے ٹورنامنٹس میں ہندوستان کی نمائندگی کر چکی ہیں۔ وہ اس ہندوستانی ٹیم کا حصہ رہیں جس نے سال 2022 کے برمنگھم دولتِ مشترکہ کھیلوں (کامن ویلتھ گیمز) میں کانسے کا تمغہ جیتا تھا۔ اس کے علاوہ خاتون ایشیائی چیمپئنز ٹرافی میں سونے کا تمغہ جیتنے والی ہندوستانی ٹیم میں بھی ان کا اہم کردار رہا۔ انہوں نے پرو لیگ، ایشیا کپ اور دیگر بڑے بین الاقوامی مقابلوں میں بھی ہندوستان کی نمائندگی کی ہے۔

اس کامیابی پر خوشی کا اظہار کرتے ہوئے جیوتی نے کہا، ’’ہندوستان کی نمائندگی کرنا ہمیشہ میری زندگی کا سب سے بڑا اعزاز رہا ہے۔ 100 بین الاقوامی مقابلے مکمل کرنا میرے لیے فخر کا لمحہ ہے اور میں اسے ہمیشہ یاد رکھوں گی۔ میں اپنے خاندان، کوچز، ساتھی کھلاڑیوں اور ان تمام لوگوں کا شکریہ ادا کرتی ہوں جنہوں نے اس سفر میں میرا ساتھ دیا۔‘‘

انہوں نے مزید کہا، ’’ہر بار ہندوستانی جرسی پہن کر میدان پر اترنا مجھے ملک کے لیے اپنا بہترین دینے کی ترغیب دیتا ہے۔ اس سفر نے مجھے کھلاڑی اور انسان دونوں شکلوں میں مضبوط بنایا ہے۔ میں آگے بھی ٹیم کی کامیابی میں اپنا تعاون دینا چاہتی ہوں اور کئی مزید یادگار لمحات بنانا چاہتی ہوں۔‘‘

ہاکی انڈیا کے صدر دلیپ ترکی نے جیوتی کو مبارکباد دیتے ہوئے کہا، ’’100 بین الاقوامی مقابلے مکمل کرنا ان کی وابستگی، تسلسل اور محنت کا ثبوت ہے۔ وہ ہندوستانی خاتون ہاکی ٹیم کی اہم کھلاڑی رہی ہیں اور ہر موقع پر ملک کے لیے لگن کے ساتھ کھیلی ہیں۔ ہمیں ان کی کامیابیوں پر فخر ہے۔‘‘ ہاکی انڈیا کے جنرل سکریٹری بھولا ناتھ سنگھ نے کہا، ’’یہ کامیابی ظاہر کرتی ہے کہ جیوتی نے طویل عرصے تک لگاتار محنت اور صبر کے ساتھ کھیل کو آگے بڑھایا ہے۔ ان کا سفر ان نوجوان کھلاڑیوں کے لیے مشعلِ راہ ہے، جو مستقبل میں ہندوستان کی نمائندگی کرنے کا خواب دیکھتے ہیں۔‘‘

ہندوستھان سماچار

---------------

ہندوستان سماچار / انظر حسن