ایف آئی ایچ خاتون ہاکی نیشنز کپ 2026 : ہندوستان نے جاپان کو 1-2 سے ہرا کر سیمی فائنل میں جگہ بنائی

آکلینڈ، 16 جون (ہ س)۔ ہندوستان کی خاتون ہاکی ٹیم نے ایف آئی ایچ خاتون ہاکی نیشنز کپ 2026 میں شاندار کارکردگی جاری رکھتے ہوئے پول-اے کے اپنے دوسرے مقابلے میں منگل کے روز جاپان کو 1-2 سے ہرا کر سیمی فائنل میں جگہ پکی کر لی۔ لگاتار دوسری جیت کے ساتھ ہندوستان پوائنٹس ٹیبل میں سرفہرست پہنچ گیا۔ نارتھ ہاربر نیشنل ہاکی سینٹر میں کھیلے گئے مقابلے میں ہندوستانی ٹیم کی کپتان سلیمہ ٹیٹے اور لالریمسوامی نے گول داغے، جبکہ جاپان کے لیے واحد گول اے ای ہیرامتسو نے کیا۔

یہ مقابلہ ہندوستانی مڈ فیلڈر جیوتی کے لیے بھی خاص رہا، جنہوں نے اپنے بین الاقوامی کریئر کا 100 واں مقابلہ کھیلا۔ پہلے دو کوارٹر میں دونوں ٹیموں نے کئی مواقع بنائے لیکن کوئی بھی گول کرنے میں کامیاب نہ ہو سکی اور وقفے تک مقابلہ گول کے بغیر رہا۔ تیسرے کوارٹر میں ہندوستان نے سبقت حاصل کی۔ 33 ویں منٹ میں پنالٹی کارنر پر شاندار حکمتِ عملی کے تحت نونیت کور کے شاٹ کو نکی پردھان نے صحیح سمت دی اور کپتان سلیمہ ٹیٹے نے گیند کو گول میں پہنچا کر ہندوستان کو 0-1 سے آگے کر دیا۔

تاہم جاپان نے فوراً جواب دیا اور 35 ویں منٹ میں پنالٹی کارنر پر ہیرامتسو نے گول کر کے اسکور 1-1 سے برابر کر دیا۔ فیصلہ کن چوتھے کوارٹر میں ہندوستان کو جیت دلانے والا گول 49 ویں منٹ میں آیا۔ سوشیلا چانو پکھرامبم نے سرکل کے کنارے سے درست پاس دیا، جس پر لالریمسوامی نے شاندار ڈیفلیکشن کے ذریعے گیند کو گول میں پہنچا دیا۔

اس جیت کے ساتھ ہندوستان نے امریکہ اور جاپان پر جیت درج کر کے چھ پوائنٹس حاصل کیے اور سیمی فائنل میں رسائی یقینی بنا لی۔ اب ہندوستانی ٹیم اپنا آخری پول مقابلہ 18 جون کو یوروگوئے کے خلاف کھیلے گی، جبکہ جاپان اور امریکہ دوسرے سیمی فائنل کی جگہ کے لیے ایک دوسرے کے سامنے ہوں گے۔

ہندوستھان سماچار

--------------

ہندوستان سماچار / انظر حسن