ایل جی لداخ نے انڈیا-منگولیا فرینڈشپ ٹری کے نام سے ایک پودا لگایا

جموں، 16 جون (ہ س)۔ لداخ کے لیفٹیننٹ گورنر ونئے کمار سکسینہ نے لیہہ میں واقع لوک نواس میں انڈیا-منگولیا فرینڈشپ ٹری کے نام سے ایک پودا لگا کر بھارت اور منگولیا کے درمیان دیرینہ ثقافتی، روحانی اور سفارتی تعلقات کو مزید مضبوط بنانے کے عزم کا اظہار کیا۔ لیفٹیننٹ گورنر نے کہا کہ یہ منگولین لارچ کا پودا منگولیا میں بھارت کے سفیر اتل ملہاری گوتسروے کی جانب سے منگولیا کے عوام کی طرف سے خیرسگالی کے تحفے کے طور پر پیش کیا گیا۔ یہ تحفہ بھگوان بدھ کے دو عظیم شاگردوں کے مقدس آثار کی 10 روزہ نمائش کے اختتام پر دیا گیا۔

سکسینہ حال ہی میں ایک بھارتی وفد کی قیادت کرتے ہوئے منگولیا کے دورے پر گئے تھے، جہاں انہوں نے مقدس آثار کی نمائش میں شرکت کی۔ انہوں نے کہا کہ انڈیا-منگولیا فرینڈشپ ٹری دونوں ممالک کے درمیان مشترکہ روحانی ورثے، امن، ہم آہنگی اور بھائی چارے کی علامت ہے۔ لیفٹیننٹ گورنر نے امید ظاہر کی کہ یہ درخت آنے والے برسوں میں بھارت اور منگولیا کے درمیان دوستی اور باہمی احترام کے مضبوط رشتوں کی یادگار کے طور پر پروان چڑھے گا اور نئی نسلوں کو ان تعلقات کو مزید مستحکم بنانے کی ترغیب دے گا۔

ہندوستھان سماچار

---------------

ہندوستان سماچار / محمد اصغر