جموں, 16 جون (ہ س)۔ مرکزی وزیر مملکت برائے سڑک ٹرانسپورٹ و شاہراہیں اجے ٹمٹا نے کہا ہے کہ جموں و کشمیر میں 2014 کے بعد سڑک اور ٹرانسپورٹ کے شعبے میں غیر معمولی ترقی ہوئی ہے اور تقریباً 1.35 لاکھ کروڑ روپے مالیت کے شاہراہی منصوبوں پر کام جاری ہے۔

اپنے دو روزہ دورۂ جموں و کشمیر کے دوران وزیر موصوف نے سری نگر-جموں قومی شاہراہ، قاضی گنڈ-بانہال اور چنینی-ناشری ٹنلوں سمیت کئی اہم منصوبوں کا معائنہ کیا۔ بعد ازاں جموں میں منعقدہ ایک اعلیٰ سطحی جائزہ اجلاس میں مختلف محکموں کے افسران اور عوامی نمائندوں نے شرکت کی۔

اجلاس میں بتایا گیا کہ 20 ہزار کروڑ روپے مالیت کے 700 کلومیٹر سڑک منصوبے مکمل ہو چکے ہیں جبکہ 50 ہزار کروڑ روپے کی لاگت سے 2300 کلومیٹر سڑکوں پر تعمیراتی کام جاری ہے۔ مزید 65 ہزار کروڑ روپے مالیت کے منصوبوں کی تفصیلی رپورٹس تیار کی جا رہی ہیں۔

اجے ٹمٹا نے کہا کہ جموں-سری نگر راہداری میں اب 25 ٹنلیں موجود ہیں جن میں سے 20 مکمل اور پانچ زیر تعمیر ہیں۔ انہوں نے کہا کہ زوجیلا، سادھنا پاس، پیر کی گلی اور دیگر اہم ٹنل منصوبے سال بھر رابطہ برقرار رکھنے میں مددگار ثابت ہوں گے۔

حکام کے مطابق جموں-ادھم پور-سری نگر فور لین کوریڈور 95 فیصد مکمل ہو چکا ہے اور اس کی تکمیل کے بعد جموں سے سری نگر کا سفر تقریباً 9 گھنٹوں سے کم ہو کر 4 گھنٹے رہ جائے گا۔

وزیر مملکت نے متعلقہ ایجنسیوں کو ہدایت دی کہ تمام منصوبے مقررہ مدت کے اندر اعلیٰ معیار اور حفاظتی اصولوں کے مطابق مکمل کیے جائیں تاکہ عوام کو بہتر سفری سہولیات فراہم کی جا سکیں۔

ہندوستھان سماچار

---------------

ہندوستان سماچار / محمد اصغر