نوئیڈا، 16 جون (ہ س)۔ نوئیڈا انٹرنیشنل ایئرپورٹ سے منگل کے روز دو نئے شہروں کے لیے بھی فضائی خدمات کا آغاز ہو گیا۔ آکاسا ایئر نے نوی ممبئی جبکہ انڈیگو نے جموں کے لیے پروازیں شروع کر دی ہیں۔ ایئرلائنز نے کیک کاٹ کر پہلی پرواز کا افتتاح کیا۔

نوئیڈا انٹرنیشنل ایئرپورٹ سے آپریشن شروع کرنے والی اکاسا ایئر دوسری ایئرلائن بن گئی ہے۔ اکاسا ایئر نے آج سے نوی ممبئی اور بنگلورو کے لیے پروازوں کا آغاز کیا ہے۔ ایئرلائن کی پہلی پرواز نوی ممبئی انٹرنیشنل ایئرپورٹ سے صبح 7:25 بجے روانہ ہوئی اور صبح 9:35 بجے نوئیڈا ایئرپورٹ پہنچی۔ اس کے بعد نوئیڈا ایئرپورٹ سے اکاسا کی پہلی پرواز صبح 10:15 بجے روانہ ہوئی اور دوپہر 12:30 بجے نوی ممبئی پہنچ گئی۔

اکاسا ایئر کی چیف گورننس اور اسٹریٹجک ایکوزیشن آفیسر پریا مہرا نے بتایا کہ نوئیڈا ایئرپورٹ سے آپریشن کا آغاز کمپنی کی ترقی کے سفر میں ایک اہم سنگِ میل ہے۔ یہ نیا ایئرپورٹ این سی آر اور آس پاس کی ریاستوں کے مسافروں کے لیے بہتر رابطے اور سفری سہولیات کے وسیع مواقع فراہم کرے گا۔

اس موقع پر یمنا انٹرنیشنل ایئرپورٹ پرائیویٹ لمیٹڈ کے وائس چیئرمین کرسٹوف شنل مین نے کہا کہ اکاسا ایئر کی آمد مسافروں اور پورے خطے کے لیے فضائی رابطے کو مضبوط بنانے کی سمت میں ایک اہم قدم ہے۔ اس سے مسافروں کو مزید پروازوں کے متبادل میسر آئیں گے اور اتر پردیش و شمالی بھارت میں معاشی ترقی اور بہتر رابطہ کاری کو فروغ ملے گا۔

اس کے ساتھ ہی نوئیڈا انٹرنیشنل ایئرپورٹ سے بنگلورو، حیدرآباد، امرتسر، جموں اور نوی ممبئی کے لیے روزانہ فضائی خدمات کا آغاز ہو گیا ہے۔ اکاسا اور انڈیگو ایئرلائنز نے اپنی اپنی پروازوں کا شیڈول بھی جاری کر دیا ہے۔

اطلاعات کے مطابق یکم جولائی سے مزید 11 شہروں کے لیے بھی پروازیں شروع ہو جائیں گی۔ اس کے بعد نوئیڈا ایئرپورٹ سے روزانہ 28 پروازیں روانہ ہوں گی۔ خاص بات یہ ہوگی کہ اب ایئرپورٹ سے دن اور رات دونوں اوقات میں پروازوں کی سہولت دستیاب ہوگی۔ ایئرپورٹ جدید کیٹ-3 آلات سے لیس ہے، جس سے خراب موسم میں بھی پروازوں کے آپریشن میں آسانی ہوگی۔

نوئیڈا انٹرنیشنل ایئرپورٹ پر مرمت، دیکھ بھال اور اوورہال (ایم آر او) ہب کی ذمہ داری بھی اکاسا ایئر کو سونپی گئی ہے۔ اس سلسلے میں کمپنی کا یاپل کے ساتھ معاہدہ ہو چکا ہے۔ کمپنی دوسرے مرحلے میں حاصل کی گئی مجموعی 1365 ہیکٹیئر زمین میں سے 40 ایکڑ پر ایم آر او ہب قائم کرے گی۔

اس کے قیام کے بعد مسافر طیاروں کی مرمت اور دیکھ بھال ایئرپورٹ پر ہی ممکن ہو سکے گی۔ فی الحال اس قسم کی سہولت کے لیے بھارت کو چین سمیت دیگر ممالک پر انحصار کرنا پڑتا ہے۔

نوئیڈا انٹرنیشنل ایئرپورٹ سے بدھ کے روز پہلی کارگو پرواز بھی شروع ہوگی۔ پہلی پرواز کے چنئی سے آنے کی توقع ہے۔ اس مقصد کے لیے ایف کام کمپنی کے ساتھ معاہدہ کیا گیا ہے۔ یہ ایک مال بردار (کارگو) ایئرلائن ہے جو خصوصی مال برداری اور سپلائی چین خدمات فراہم کرنے کے لیے بوئنگ 737-800 فریٹر طیاروں کا استعمال کرتی ہے۔

یہی کمپنی ایئرپورٹ سے کارگو پروازوں کا آپریشن سنبھالے گی۔ پہلی کارگو پرواز 17 جون کو چنئی سے نوئیڈا ایئرپورٹ پہنچنے کی توقع ہے۔

ہندوستھان سماچار

---------------

ہندوستان سماچار / عبدالواحد