کولکاتا، 15 جون (ہ س)۔ مغربی بنگال کے وزیراعلیٰ شوبھندو ادھیکاری نے پیر کے روز وزیراعلیٰ بننے کے بعد پہلی بار کولکاتا میونسپل کارپوریشن (کے ایم سی) ہیڈکوارٹر میں منعقدہ ایک پروگرام میں شرکت کی۔ اس دوران اسٹیج اور پروگرام کے مقام پر ترنمول کانگریس سے وابستہ کئی اہم رہنما، کونسلر اور سابق عوامی نمائندے موجود نظر آئے۔

پروگرام میں سابق وزیراعلیٰ ممتا بنرجی کی بھابھی اور وارڈ نمبر 73 کی کونسلر کجری بنرجی بھی موجود تھیں۔ ان کے علاوہ کے ایم سی کے سابق میئر اور حال ہی میں عہدے سے مستعفی ہونے والے فرحاد حکیم بھی پروگرام میں شریک ہوئے۔

اس موقع پر کونسلر اننیا بنرجی، جوئی بوس، سابق رکن اسمبلی دیباشیش کمار سمیت کئی دیگر عوامی نمائندے بھی موجود تھے۔ پروگرام میں ریاستی وزیر شاشی پانجا کی بیٹی اور وزیر چندرما بھٹاچاریہ کے بیٹے کی موجودگی بھی توجہ کا مرکز رہی۔

کے ایم سی میں منعقدہ اس پروگرام میں وزیراعلیٰ شوبھندو ادھیکاری نے صفائی سے استقبال مہم کا آغاز کیا۔ اسٹیج پر ان کے ساتھ جنوبی کولکاتا کی رکن پارلیمان مالا رائے، سندیپن سہا اور جاوید خان بھی موجود تھے۔

سیاسی طور پر اس پروگرام کو اہم قرار دیا جا رہا ہے کیونکہ وزیراعلیٰ بننے کے بعد شوبھندو ادھیکاری کی میونسپل کارپوریشن میں یہ پہلی سرکاری موجودگی تھی۔ پروگرام میں مختلف سیاسی جماعتوں اور پس منظر سے تعلق رکھنے والے نمائندوں کی موجودگی نے بھی لوگوں کی توجہ حاصل کی۔

پروگرام کے دوران صفائی، شہری خدمات اور شہری ترقی سے متعلق مختلف امور پر گفتگو ہوئی اور میونسپل کارپوریشن کے علاقے میں جاری صفائی مہمات کے حوالے سے بھی پیغام دیا گیا۔

ہندوستھان سماچار

---------------

ہندوستان سماچار / عبدالواحد