کولکاتا، 15 جون (ہ س)۔ مغربی بنگال کی وزیر اعلیٰ ممتا بنرجی نے پیر کو اشارہ دیا کہ کولکاتا میونسپل کارپوریشن (کے ایم سی) کے انتخابات 7 دسمبر تک ہو سکتے ہیں۔ انتخابات سے قبل وارڈوں کی حد بندی کا عمل مکمل کر لیا جائے گا۔

وزیراعلیٰ نے یہ معلومات کے ایم سی ہیڈ کوارٹر میں منعقدہ اجلاس کے دوران بتائی۔ ممبران پارلیمنٹ، ایم ایل ایز، کولکاتہ علاقے کے سبکدوش ہونے والے کونسلرز اور میونسپل کارپوریشن کے افسران نے میٹنگ میں شرکت کی۔ میونسپل انتظامیہ سے متعلق مختلف امور اور آئندہ انتخابات کی تیاریوں پر تبادلہ خیال کیا گیا۔

قابل ذکر ہے کہ بدلتے ہوئے سیاسی منظر نامے کے درمیان کے ایم سی کے میئر فرہاد حکیم نے اپنے عہدے سے استعفیٰ دے دیا تھا۔ اگرچہ موجودہ بورڈ کی میعاد دسمبر تک چلتی ہے، لیکن میئر کے استعفیٰ کے بعد میونسپل کارپوریشن بورڈ کو تحلیل کر دیا گیا۔ اس کے بعد ریاستی محکمہ بلدیات اور شہری ترقیات نے میونسپل کمشنر سمیتا پانڈے کو ایڈمنسٹریٹر مقرر کیا۔

میٹنگ کے دوران وزیر اعلیٰ نے کہا کہ کولکاتہ میونسپل کارپوریشن کے علاقے میں حد بندی کی ضرورت ہے۔ انہوں نے ذکر کیا کہ بھوانی پور اسمبلی حلقہ سے الیکشن لڑتے ہوئے انہوں نے کچھ وارڈوں میں پولنگ اسٹیشنوں کی ضرورت سے زیادہ تعداد دیکھی، جب کہ دیگر میں یہ تعداد کافی کم تھی۔

وزیر اعلیٰ نے کہا، بھوانی پور میں انتخاب لڑتے ہوئے، میں نے دیکھا کہ وارڈ نمبر 77 میں 49 پولنگ اسٹیشن ہیں، جب کہ دیگر کئی وارڈوں میں 20 سے کم ہیں۔ ہم سب متفق ہیں کہ حد بندی ہونی چاہیے۔ ریاستی حکومت سفارش کرے گی اور ریاستی الیکشن کمیشن اس عمل کو مکمل کرے گا۔ اس کے ذمہ دار ادارے اپنی ذمہ داریاں نبھائیں گے۔

انہوں نے واضح کیا کہ کولکاتہ میونسپل کارپوریشن کے انتخابات کے لئے نوٹیفکیشن صرف حد بندی کے عمل کے مکمل ہونے کے بعد جاری کیا جائے گا۔ نتیجتاً یہ خیال کیا جا رہا ہے کہ انتخابات دسمبر کے پہلے ہفتے تک ہو سکتے ہیں۔

وزیر اعلیٰ کے اس بیان کو سیاسی حلقوں میں اہم قرار دیا جا رہا ہے، کیونکہ یہ کولکاتہ میونسپل کارپوریشن کے انتخابات کے ممکنہ ٹائم لائن کے حوالے سے پہلا واضح اشارہ ہے۔ اب سب کی نظریں حد بندی کے عمل اور ریاستی الیکشن کمیشن کے اگلے لائحہ عمل پر لگی ہوئی ہیں۔

---------------

ہندوستان سماچار / عبدالسلام صدیقی