مستقبل میں نوئیڈا انٹرنیشنل ایئرپورٹ کو ہائی اسپیڈ ریل سے بھی جوڑنے کی تیاری

نوئیڈا، 15 جون (ہ س)۔ اتر پردیش کے ضلع گوتم بدھ نگر میں قائم نوئیڈا انٹرنیشنل ایئرپورٹ سے آج فضائی خدمات کا آغاز ہو گیا۔ یہاں سے پہلی پرواز کو مرکزی وزیرِ ہوا بازی کے رام موہن نائیڈو نے ہری جھنڈی دکھا کر روانہ کیا۔ اس پہلی پرواز کے ذریعے ایئرپورٹ کے لیے زمین فراہم کرنے والے کسانوں کو لکھنؤ بھیجا گیا ہے، جہاں وہ وزیرِ اعلیٰ یوگی آدتیہ ناتھ سے ملاقات کریں گے۔ آج سے چار مقامات کے لیے پروازیں شروع کی گئی ہیں اور آنے والے چند مہینوں میں یہاں سے 12 مقامات کے لیے فضائی خدمات شروع ہو جائیں گی۔

اس موقع پر مرکزی وزیرِ ہوا بازی کے رام موہن نائیڈو نے کہا کہ ہمیں خوشی ہے کہ جن کسانوں نے ایئرپورٹ کے لیے اپنی زمین دی، وہ آج پہلی پرواز کے ذریعے لکھنؤ جا کر اتر پردیش کے وزیرِ اعلیٰ یوگی آدتیہ ناتھ سے ملاقات کریں گے۔ یہ ایک تاریخی دن ہے۔ اس منصوبے کو لے کر لوگوں میں کافی جوش و خروش تھا اور آج وہ دن آ گیا ہے جب فضائی خدمات کا آغاز ہو گیا ہے۔

مرکزی وزیر نے اس منصوبے کی تعمیر سے وابستہ تمام افراد، کسانوں اور دیگر متعلقہ لوگوں کو مبارک باد پیش کی۔ انہوں نے کہا کہ نوئیڈا انٹرنیشنل ایئرپورٹ وزیرِ اعظم نریندر مودی کے وژن کا حصہ تھا۔ انہوں نے تصور کیا تھا کہ یہاں ایک جدید ایئرپورٹ قائم ہونا چاہیے۔ اس وژن کو اتر پردیش کے وزیرِ اعلیٰ یوگی آدتیہ ناتھ اور دیگر افراد نے ایک مشن کے طور پر مکمل کیا۔

مرکزی وزیرِ ہوا بازی نائیڈو نے جیور کے رکنِ اسمبلی دھیریندر سنگھ کی بھی تعریف کرتے ہوئے کہا کہ انہوں نے کسانوں کو سمجھا کر زمین فراہم کرنے کے لیے آمادہ کیا۔ اس ایئرپورٹ کے فعال ہونے سے نوجوانوں کو بڑا فائدہ ہوگا اور ہزاروں روزگار کے مواقع پیدا ہوں گے۔ اس کا براہِ راست فائدہ جیور اور آس پاس کے علاقوں کے لوگوں کو ملے گا۔

انہوں نے کہا کہ نوئیڈا انٹرنیشنل ایئرپورٹ مستقبل میں ایک بڑا مرکز بننے جا رہا ہے۔ یہ اندرونِ ملک فضائی آپریشنز کے لیے ایک اہم مرکز ثابت ہوگا۔ ان کے مطابق جیور مستقبل میں ایشیا کا سب سے بڑا ایئرپورٹ بنے گا۔ اس سے صنعت، مینوفیکچرنگ، مہمان نوازی اور زراعت کے شعبوں میں نمایاں ترقی ہوگی۔ انہوں نے کہا کہ اس ایئرپورٹ پر متعدد صنعتیں انحصار کریں گی۔

انہوں نے بتایا کہ ابتدائی مرحلے میں سالانہ 1.2 کروڑ مسافروں کی گنجائش کے ساتھ آغاز کیا جا رہا ہے، جبکہ چوتھے مرحلے تک اس گنجائش کو بڑھا کر 7 کروڑ مسافروں تک پہنچانے کا ہدف مقرر کیا گیا ہے۔ انہوں نے کہا کہ یہاں ایک ایم آر او نیٹ ورک کا سنگِ بنیاد بھی وزیرِ اعظم نے رکھا تھا۔ اس ایئرپورٹ کے فعال ہونے سے کئی نئی سرگرمیوں کا آغاز ہوگا۔

مرکزی وزیرِ ہوا بازی نائیڈو نے کہا کہ آج سے چار مقامات کے لیے پروازیں شروع کی جا رہی ہیں، جبکہ آنے والے مہینوں میں 12 منزلوں تک پروازیں چلائی جائیں گی۔ مستقبل میں ملک کے تمام بڑے مقامات کو نوئیڈا انٹرنیشنل ایئرپورٹ سے جوڑ دیا جائے گا۔

انہوں نے کہا کہ یہ ایئرپورٹ مغربی اتر پردیش کے کئی شہروں کو آپس میں جوڑتا ہے اور یہ خطے کے لیے ایک اہم فضائی مرکز بنے گا۔ اس ایئرپورٹ سے کئی شاہراہیں منسلک ہیں، جس کے باعث اتر پردیش اور ہریانہ کے لوگ بھی یہاں سے پروازوں کا فائدہ اٹھا سکیں گے۔

انہوں نے مزید کہا کہ مستقبل میں اس ایئرپورٹ کو ہائی اسپیڈ ریل کے ذریعے بھی جوڑا جائے گا۔ ایک سوال کے جواب میں انہوں نے کہا کہ اگر کوئی فضائی کمپنی پرواز منسوخ کرتی ہے تو مسافروں کے مفادات کا مکمل خیال رکھا جائے گا۔

ہندوستھان سماچار

---------------

ہندوستان سماچار / عبدالواحد