جموں, 15 جون (ہ س)۔

ضلع راجوری کی تحصیل منجاکوٹ کے گاؤں کوٹلی کلابان میں گزشتہ 48 گھنٹوں کے دوران زمین دھنسنے کا ایک سنگین واقعہ پیش آیا ہے، جس کے نتیجے میں زرعی اراضی کے ایک بڑے حصے کو نقصان پہنچا ہے جبکہ کم از کم چار رہائشی ڈھانچوں میں بڑی دراڑیں پڑ گئی ہیں اور کئی دیگر مکانات بھی خطرے کی زد میں آ گئے ہیں۔مقامی لوگوں کے مطابق زمین دھنسنے کے باعث گاؤں میں خوف و ہراس کا ماحول ہے اور مکینوں کو اندیشہ ہے کہ آنے والے دنوں میں مزید نقصان ہو سکتا ہے۔ متاثرہ افراد نے بتایا کہ علاقے میں زیرِ تعمیر نئے شاہراہی منصوبے کے دوران بھاری مشینری کے استعمال سے زمین میں لرزش پیدا ہوئی، جس کے نتیجے میں یہ صورتحال سامنے آئی۔

واقعے کی اطلاع ملتے ہی ضلع انتظامیہ کی ایک اعلیٰ سطحی ٹیم، جس کی قیادت ڈپٹی کمشنر راجوری ابھیشیک شرما نے کی، موقع پر پہنچی اور متاثرہ علاقے کا معائنہ کرکے صورتحال کا جائزہ لیا۔ادھر محکمہ تعمیرات عامہ (پی ڈبلیو ڈی) نے بھی فوری کارروائی کرتے ہوئے اپنی مشینری تعینات کر دی ہے تاکہ زمین دھنسنے سے بند ہونے والی سڑک کو دوبارہ بحال کیا جا سکے۔مقامی باشندوں نے انتظامیہ سے مطالبہ کیا ہے کہ متاثرہ خاندانوں کو فوری امداد فراہم کرنے کے ساتھ ساتھ علاقے میں زمین دھنسنے کی وجوہات کی مکمل تحقیقات کرائی جائیں تاکہ مزید نقصان سے بچا جا سکے۔

ہندوستھان سماچار

---------------

ہندوستان سماچار / محمد اصغر