جموں, 15 جون (ہ س)۔

مہاجر کشمیری پنڈتوں کی نمائندہ تنظیم پنُن کشمیر نے جموں میں منعقدہ ایک پریس کانفرنس کے دوران سری نگر کے شیرِ کشمیر انٹرنیشنل کانفرنس سینٹر میں حال ہی میں منعقدہ کانکلیو کو سختی سے مسترد کرتے ہوئے اسے کشمیری پنڈت برادری کے بنیادی مسائل سے توجہ ہٹانے کی کوشش قرار دیا ہے۔

تنظیم کی قیادت نے کہا کہ چند بیرونِ ملک مقیم کشمیری پنڈتوں کی جانب سے ہیریٹیج ٹورکے عنوان سے منعقد کیا گیا یہ اجتماع دراصل ایسے بیانیے تشکیل دینے کی کوشش ہے جو کشمیری پنڈتوں کی جدوجہد، ان کی بے دخلی اور ان کے دیرینہ مطالبات کو نظرانداز کرتے ہیں۔پنُن کشمیر کے رہنماؤں نے زور دے کر کہا کہ کشمیری پنڈت برادری کے لیے محض ثقافتی یا سیاحتی سرگرمیاں مسائل کا حل نہیں ہیں، بلکہ ان کے مطابق اصل ضرورت کشمیری پنڈتوں کے خلاف ہونے والی مبینہ نسل کشی کو قانونی طور پر تسلیم کرنے، اس حوالے سے قانون سازی کرنے اور برادری کے لیے ایک محفوظ و خودمختار وطن کے قیام کی ہے۔

تنظیم نے حکومت اور متعلقہ اداروں سے مطالبہ کیا کہ وہ کشمیری پنڈتوں کے بنیادی سیاسی، سماجی اور آئینی مطالبات پر سنجیدگی سے غور کریں اور ایسے اقدامات سے گریز کریں جو ان کے بقول اصل مسائل کو پسِ پشت ڈالنے کا سبب بنیں۔

ہندوستھان سماچار

---------------

ہندوستان سماچار / محمد اصغر