جموں، 15 جون (ہ س)۔ جموں و کشمیر کے سابق وزیر اجات شترو سنگھ، ڈاکٹر ریتو سنگھ اور رنوِجے سنگھ نے لیفٹیننٹ گورنر منوج سنہا سے لوک بھون میں ملاقات کی اور جموں و کشمیر میں جاری مختلف سماجی اور مذہبی سرگرمیوں پر تبادلہ خیال کیا۔ملاقات کے دوران وفد نے لیفٹیننٹ گورنر کی قیادت میں چلائی جا رہی ’نشہ مکت جموں کشمیر ابھیان‘ کی ستائش کرتے ہوئے کہا کہ اس مہم نے نوجوانوں میں منشیات کے مضر اثرات کے بارے میں بیداری پیدا کرنے اور معاشرے کے مختلف طبقات کو اس لعنت کے خلاف متحد کرنے میں اہم کردار ادا کیا ہے۔

ڈاکٹر ریتو سنگھ نے اس موقع پر دہلی پبلک اسکولز کی جانب سے منشیات مخالف مہم کے تحت انجام دی گئی مختلف سرگرمیوں کی تفصیلات بھی لیفٹیننٹ گورنر کو پیش کیں۔ انہوں نے کہا کہ تعلیمی ادارے نوجوان نسل کو منشیات سے دور رکھنے اور انہیں مثبت سرگرمیوں کی جانب راغب کرنے میں مؤثر کردار ادا کر رہے ہیں۔انہوں نے لیفٹیننٹ گورنر کا شکریہ ادا کرتے ہوئے ’شری رگھوناتھ جی کی مہا آرتی سنستھا‘‘کے قیام کو ایک اہم اقدام قرار دیا اور کہا کہ اس سے مذہبی اور سماجی سرگرمیوں کو نئی توانائی ملی ہے۔

ان کے مطابق ’مہاشکتی‘ کے پلیٹ فارم کے تحت خواتین کی بڑی تعداد تنظیمی سرگرمیوں میں بڑھ چڑھ کر حصہ لے رہی ہے۔

ڈاکٹر ریتو سنگھ نے آئندہ شری امرناتھ یاترا کے دوران یاتریوں کے استقبال کے لیے شری رگھوناتھ جی کی مہا آرتی سنستھا کی سرگرمیوں کے حوالے سے بھی لیفٹیننٹ گورنر سے تعاون کی درخواست کی۔ ملاقات میں عوامی فلاح و بہبود، ثقافتی روایات کے فروغ اور جموں و کشمیر میں مذہبی تقریبات کے کامیاب انعقاد کے لیے سرکاری اداروں، تعلیمی تنظیموں اور سماجی گروپوں کے باہمی تعاون کی اہمیت پر زور دیا گیا۔

ہندوستھان سماچار

---------------

ہندوستان سماچار / محمد اصغر