ناسک، 15 جون (ہ س) ناسک میونسپل کارپوریشن کی حدود میں رہنے والے والدین سے اپیل کی گئی ہے کہ وہ اپنے بچوں کا داخلہ صرف مجاز اور منظور شدہ اسکولوں میں ہی کرائیں۔ ناسک میونسپل کارپوریشن کی تعلیمی انتظامی افسر ڈاکٹر میتا چودھری نے واضح کیا ہے کہ شہر میں پانچ اسکولوں کو غیر مجاز قرار دیا گیا ہے، لہٰذا کسی بھی صورت میں ان اداروں میں بچوں کا داخلہ نہ کرایا جائے۔

انہوں نے کہا کہ والدین اپنے بچوں کو کسی بھی غیر مجاز یا بند ہوچکے تعلیمی ادارے میں داخل نہ کریں۔ اگر کوئی والدین محکمہ تعلیم کے ضوابط کی خلاف ورزی کرتے ہوئے کسی غیر مجاز اسکول میں داخلہ کراتے ہیں اور بعد میں طلبہ کو کسی قسم کا تعلیمی نقصان پہنچتا ہے تو اس کی مکمل ذمہ داری والدین پر عائد ہوگی۔

میونسپل انتظامیہ کی جانب سے جن پانچ اسکولوں کو غیر مجاز قرار دیا گیا ہے، ان میں سینٹ زیویئرس فرانسس انگلش میڈیم اسکول، جیل روڈ، وملا دیوی انگلش میڈیم اسکول، امبڈ، بدھسٹ انٹرنیشنل انگلش اسکول، ناسک روڈ، بدھسٹ انٹرنیشنل انگلش اسکول، پاتھردی اور بدھسٹ انٹرنیشنل انگلش اسکول، وڈالا شامل ہیں۔

ناسک میونسپل کارپوریشن نے والدین سے ایک بار پھر اپیل کی ہے کہ وہ بچوں کے تعلیمی مستقبل کو مدنظر رکھتے ہوئے داخلے سے قبل اسکول کی قانونی حیثیت اور سرکاری منظوری کی مکمل جانچ ضرور کریں تاکہ طلبہ کو مستقبل میں کسی بھی قسم کے تعلیمی مسائل یا نقصان کا سامنا نہ کرنا پڑے۔

ہندوستھان سماچار

--------------------

ہندوستان سماچار / جاوید این اے