بیڑ، 15 جون (ہ س)۔ ضلع بیڑ کے کیج۔امباجوگائی روڈ پر چاقو کی نوک پر ایک میاں بیوی کو لوٹنے والے چار ڈکیتوں میں سے دو عادی مجرموں کو کیج پولیس نے فلمی انداز میں تعاقب کرتے ہوئے گرفتار کر لیا۔ اس کامیاب کارروائی کے بعد علاقے میں پولیس کی ستائش کی جا رہی ہے۔موصولہ اطلاعات کے مطابق دھن راج سوریہ ونشی اپنی اہلیہ کے ساتھ موٹر سائیکل پر پسیگاؤں پھاٹے سے اپنے گاؤں جا رہے تھے۔ اسی دوران چار نامعلوم ڈکیتوں نے ان کی موٹر سائیکل روک لی۔ ملزمین نے چاقو دکھا کر جوڑے کو دھمکایا اور ان کے قبضے سے نقد رقم اور سونے کے زیورات زبردستی چھین لیے۔ واردات کے دوران متاثرہ میاں بیوی نے شور مچایا جس سے گھبرا کر ڈکیت اپنی ایک موٹر سائیکل موقع پر ہی چھوڑ کر قریبی جنگل کی طرف فرار ہو گئے۔واقعے کی اطلاع ملتے ہی کیج پولیس اسٹیشن کے پولیس انسپکٹر سوپنل انوَنے اور ان کی ٹیم نے فوری طور پر تفتیش شروع کر دی۔ سی سی ٹی وی فوٹیج اور دیگر معلومات کی بنیاد پر پولیس کو معلوم ہوا کہ مشتبہ ملزمین کیج شہر سے کالمب روڈ کی جانب جا رہے ہیں۔ پولیس نے انہیں رکنے کا اشارہ دیا، تاہم ملزمین نے پولیس کو دیکھتے ہی فرار ہونے کی کوشش کی۔ اس پر پولیس نے فوری تعاقب کرتے ہوئے ہوٹل سنتوش پیلس کے سامنے دو ملزمان کو گرفتار کر لیا۔ گرفتار شدگان ضلع عثمان آباد کے رہائشی بتائے جاتے ہیں۔پولیس نے ملزمین کی تلاشی کے دوران لوٹی گئی نقد رقم برآمد کر لی ہے۔ اس سلسلے میں کیج پولیس اسٹیشن میں بھارتیہ نیائے سنہتا کی متعلقہ دفعات کے تحت مقدمہ درج کر لیا گیا ہے جبکہ فرار دیگر ملزمان کی تلاش جاری ہے۔ہندوستھان سماچار--------------------

ہندوستان سماچار / جاوید این اے