اپوزیشن کی شدید تنقید، اجیت پوار گروپ کے کارپوریٹر نے نوٹس جاری کیاپونے، 15 جون (ہ س)۔ پمپری-چنچوڑ شہر کے شہریوں کو میونسپل کارپوریشن کے اجلاسوں کی کارروائی سے باخبر رکھنے اور انتظامی شفافیت کو فروغ دینے کے مقصد سے شروع کی گئی میونسپل کارپوریشن کی جنرل باڈی میٹنگ کی آن لائن براہِ راست نشریات (لائیو اسٹریمنگ) بند کرنے کا فیصلہ کیا گیا ہے۔ اس فیصلے کے بعد برسراقتدار بھارتیہ جنتا پارٹی کو شدید تنقید کا سامنا کرنا پڑ رہا ہے جبکہ اپوزیشن جماعتوں نے بھی اس کی سخت مخالفت کی ہے۔

واضح کیا گیا ہے کہ پیر 15 جون کو منعقد ہونے والے جنرل باڈی اجلاس کی براہِ راست نشریات نہیں کی جائیں گی۔ اس فیصلے کے خلاف نیشنلسٹ کانگریس پارٹی (اجیت پوار گروپ) کے کارپوریٹر سندیپ واگھیرے نے میونسپل کمشنر کو باضابطہ نوٹس جاری کیا ہے۔میونسپل کارپوریشن میں بھارتیہ جنتا پارٹی کے دوبارہ اقتدار میں آنے کے بعد اجلاسوں کی کارروائی میں شفافیت لانے کے لیے آن لائن نشریات کا مطالبہ زور پکڑ گیا تھا۔ اس مطالبے کو مدنظر رکھتے ہوئے اُس وقت کے میئر روی لانڈگے نے میونسپل کمشنر کو اجلاسوں کی براہِ راست نشریات شروع کرنے کی ہدایت دی تھی۔ اس کے بعد شہری اپنے گھروں میں بیٹھ کر میونسپل کارپوریشن کی کارروائی براہِ راست دیکھ سکتے تھے۔اس سہولت کے ذریعے شہریوں، سماجی کارکنوں اور منتخب نمائندوں کے حامیوں کو اپنے عوامی نمائندوں کے مؤقف، مختلف مسائل پر ان کی آرا اور اجلاسوں میں ان کی سرگرمیوں کے بارے میں براہِ راست معلومات حاصل ہوتی تھیں۔ اس کے علاوہ یہ بھی معلوم ہوتا تھا کہ کون سا کارپوریٹر کن موضوعات پر زیادہ سرگرم ہے۔ دریں اثنا، بعض کارپوریٹروں نے اجلاسوں میں اپنی تقاریر کی ویڈیوز اور سماجی رابطوں کی ویب سائٹس کے لیے مختصر ویڈیوز تیار کرکے انہیں نشر کرنا شروع کر دیا تھا، جنہیں شہریوں کی جانب سے اچھا ردعمل بھی حاصل ہو رہا تھا۔تاہم اب اچانک براہِ راست نشریات بند کرنے کے فیصلے کے بعد میونسپل انتظامیہ کی شفافیت پر سوالات اٹھنے لگے ہیں۔ اس معاملے پر میونسپل کارپوریشن کے سیاسی حلقوں میں کشیدگی بڑھنے کے آثار بھی ظاہر ہونے لگے ہیں۔ہندوستھان سماچار

ہندوستان سماچار / جاوید این اے