لکھنو، 15 جون (ہ س)۔ عام آدمی پارٹی (اے اے پی) کے چیف ریاستی ترجمان ونشراج دوبے نے ایک بڑے گھوٹالہ کا الزام لگایا ہے اور دعوی کیا ہے کہ اتر پردیش میں 427 مستفیدین نے پردھان منتری آواس یوجنا (وزیر اعظم ہاوسنگ اسکیم) کے تحت الگ الگ رہائش گاہ اورپہچان دکھا کر دو دوگھر حاصل کیے ہیں۔

انہوں نے پیر کے روز راجدھانی لکھنو میں پارٹی ہیڈکوارٹر میں نامہ نگاروں کو بتایا کہ یہ صرف اسکیم کی خامی نہیں ہے بلکہ غریبوں اور ضرورت مندوں کے حقوق کی کھلم کھلا لوٹ مار ہے۔ مرکزی دیہی ترقی کی وزارت کی تحقیقات سے سامنے آنے والا یہ معاملہ ثابت کرتا ہے کہ ریاست میں گڈ گورننس اور شفافیت کے دعوے صرف کاغذوں اور اشتہارات تک محدود ہیں، جب کہ زمین پر بدعنوانی کا ایک منظم نیٹ ورک کام کر رہا ہے۔

عام آدمی پارٹی کے چیف ریاستی ترجمان ونشراج دوبے نے کہا کہ پردھان منتری آواس یوجنا غریبوں کو مستقل مکان فراہم کرنے کے لیے شروع کی گئی تھی، لیکن اتر پردیش میں اس کے فوائد حقیقی مستحق لوگوں تک پہنچنے کے بجائے، یہ دھوکہ دہی اور ملی بھگت کا شکار ہو گئی۔ مرکزی دیہی ترقی کی وزارت کی طرف سے کی گئی تحقیقات نے ریاست میں 427 لوگوں کی شناخت کی ہے جنہوں نے پردھان منتری آواس یوجنا (دیہی) اور پردھان منتری آواس یوجنا (شہری) دونوں کا فائدہ اٹھا کر دو مکانات حاصل کیے ہیں۔ للت پور میں 50، باندہ میں 26، سیتا پور اور پرتاپ گڑھ میں 21، 21 معاملوں کا سامنے آنا ظاہر کرتا ہے کہ یہ کوئی الگ تھلگ غلطی نہیں ہے بلکہ ایک منظم بدعنوانی ہے۔

---------------

ہندوستان سماچار / عبدالسلام صدیقی