امراوتی، 12 جون (ہ س)۔ مہاجن پورہ بھاتکولی روڈ پر واقع پنچی بائی کی واڑی میں کنویں میں گرنے والی ایک خاتون کو امراوتی میونسپل کارپوریشن کے فائر بریگیڈ عملے نے بروقت ریسکیو کارروائی کرتے ہوئے بحفاظت باہر نکال لیا، جس سے ان کی جان بچ گئی۔ یہ واقعہ جمعہ کی صبح پیش آیا۔اطلاعات کے مطابق، امراوتی پولیس کنٹرول روم کی جانب سے صبح 6 بج کر 45 منٹ پر فائر بریگیڈ ہیڈکوارٹر کو ایک خاتون کے کنویں میں گرنے کی اطلاع موصول ہوئی۔ اطلاع ملتے ہی فائر بریگیڈ سپرنٹنڈنٹ اجے پندھرے کی ہدایت پر فائر لاری (ایم ایچ 27 بی ایکس 7803) فوری طور پر جائے وقوعہ کے لیے روانہ کی گئی۔فائر بریگیڈ ٹیم میں گاڑی کے ڈرائیور نلیش آجنے، سنجے چوہان اور فائر مین منیش اُتانے، راہل گھوڑے، امول نستانے اور محمد طاہر شامل تھے۔ ٹیم چند ہی منٹوں میں موقع پر پہنچ گئی اور ریسکیو آپریشن شروع کر دیا۔ واقعے کے وقت کنویں کے اطراف بڑی تعداد میں شہری جمع تھے۔ فائر بریگیڈ اہلکاروں نے رسی کی سیڑھی کی مدد سے کنویں میں اتر کر خاتون کی کمر کے ساتھ حفاظتی رسی باندھی اور انتہائی احتیاط کے ساتھ انہیں اوپر نکال لیا۔بچائی گئی خاتون کی شناخت آشا سریش دودھے (عمر 58 سال)، ساکن کانچن وہار، گڈگڈیشور مندر علاقہ، کے طور پر ہوئی ہے۔ ریسکیو کے بعد خاتون کو مزید طبی معائنے اور علاج کے لیے سرکاری اسپتال منتقل کر دیا گیا۔ واقعے میں کسی قسم کی جانی نقصان یا سنگین چوٹ کی اطلاع نہیں ہے جبکہ پولیس معاملے کی مزید تحقیقات کر رہی ہے۔ فائر بریگیڈ کی بروقت اور مؤثر کارروائی پر مقامی شہریوں نے اہلکاروں کی بھرپور ستائش کی اور ان کی پیشہ ورانہ مہارت کو سراہا۔ہندوستھان سماچار--------------------

ہندوستان سماچار / جاوید این اے