بھوپال، 12 جون (ہ س)۔ راجدھانی بھوپال کا بیرا گڑھ روڈ جمعہ کی علی الصبح پٹاخوں کے دھماکوں اور ہولناک آگ کے شعلوں سے دہل اٹھا۔ یہاں حلال پورہ میں واقع مرکزی سڑک کے کنارے بنی ایک پٹاخہ دکان میں اچانک خوفناک آگ لگ گئی۔ دکان میں رکھے لاکھوں روپے کے پٹاخوں میں دھماکوں کی وجہ سے آگ نے کچھ ہی منٹوں میں خوفناک شکل اختیار کر لیا۔ تاہم فائر بریگیڈ کی ٹیم نے آگ پر پوری طرح قابو پا لیا ہے۔

معلومات کے مطابق، یہ خوفناک حادثہ بیرا گڑھ روڈ پر واقع سندر ون گارڈن کے بالکل سامنے چلنے والی ’سونی پٹاخہ دکان‘ میں علی الصبح قریب 3.30 بجے پیش آیا۔ چونکہ دکان مرکزی سڑک کے بالکل کنارے واقع ہے، جہاں دن کے وقت بھاری ٹریفک اور گاڑیوں کی آمد و رفت رہتی ہے، اس لیے غنیمت یہ رہی کہ حادثہ دیر رات ہوا، ورنہ بڑا سانحہ ہو سکتا تھا۔ دھماکوں کی آواز سن کر آس پاس کے رہائشی سہم گئے اور فوری طور پر اس کی اطلاع فائر بریگیڈ اور مقامی پولیس کو دی گئی۔ آگ کی لپٹیں قریب 70 فٹ اوپر تک اٹھیں۔ واقعے کی اطلاع ملتے ہی شہر کے کئی فائر اسٹیشنوں سے فائر بریگیڈ کی گاڑیاں اور بھاری پولیس فورس موقع پر پہنچ گئی۔

حلال پورہ کا مرکزی اور بڑا پٹاخہ مارکیٹ اس دکان سے محض کچھ ہی دوری پر واقع ہے۔ اتنا ہی نہیں، جائے وقوعہ کے بالکل پاس ایک پٹرول پمپ بھی موجود ہے، جس سے علاقے پر ایک بڑا خطرہ منڈلا رہا تھا۔ سونی پٹاخہ دکان میں لاکھوں روپے کے کئی کلو گرام پٹاخے اور بارود کا اسٹاک بھرا ہوا تھا، جو اس آتشزدگی میں پوری طرح جل کر خاک ہو گیا۔ آگ لگنے کی درست وجوہات کا ابھی پتہ نہیں چل سکا ہے، جس کی جانچ کی جا رہی ہے۔

آگ اتنی خوفناک تھی کہ دکان کے اندر سے جلتے ہوئے پٹاخے اور راکٹ اڑ کر مرکزی سڑک پر آ رہے تھے۔ خطرے کو بھانپتے ہوئے موقع پر پہنچی پولیس نے فوری کارروائی کی اور سڑک کے ایک طرف کی ٹریفک پوری طرح بند کرا دی۔ سیکورٹی کے پیشِ نظر بجلی کمپنی کو اطلاع دے کر پورے علاقے کی بجلی سپلائی فوری کٹوائی گئی۔

فائر فائٹر شاہنواز احمد نے بتایا کہ اطلاع ملتے ہی فتح گڑھ، بیرا گڑھ اور گاندھی نگر سمیت کئی فائر اسٹیشنوں سے فائر بریگیڈ کی گاڑیاں فوری طور پر موقع پر بھیجی گئیں۔ دکان میں بارود کی موجودگی کی وجہ سے آگ بار بار بھڑک رہی تھی۔ ہماری ٹیموں نے حکمتِ عملی کے تحت مورچہ سنبھالا اور قریب تین گھنٹے سے زائد وقت کی بھاری مشقت کے بعد صبح 7.00 بجے تک آگ پر پوری طرح قابو پا لیا گیا۔ صورتحال اب پوری طرح قابو میں ہے۔

ہندوستھان سماچار

---------------

ہندوستان سماچار / انظر حسن