سرینگر 10 جون (ہ س) ۔جموں و کشمیر کے نائب وزیر اعلیٰ سریندر کمار چودھری نے بدھ کے روز بانڈی پورہ ضلع کے اپنے دورے کے دوران جموں و کشمیر کو ریاست کا درجہ بحال کرنے کی پرزور وکالت کی اور اسے اس کے لوگوں کے وقار اور شناخت کو بحال کرنے کا معاملہ قرار دیا۔ ضلع کے ترقیاتی دورے کے دوران میڈیا سے بات کرتے ہوئے نائب وزیر اعلیٰ نے سماجی تنظیموں، سول سوسائٹی گروپس اور عام لوگوں پر زور دیا کہ وہ ریاست کی بحالی کے مطالبے کی حمایت میں جنتر منتر پر مجوزہ احتجاج میں شرکت کریں۔ انہوں نے کہا کہ ریاست کی بحالی محض ایک سیاسی مسئلہ نہیں ہے بلکہ جموں و کشمیر کے لوگوں کی اجتماعی خواہش ہے۔ چودھری نے زور دے کر کہا کہ اس عوامی مطالبے کی حمایت میں آگے آنے والوں کو جموں و کشمیر کے لوگوں کے حقیقی خیر خواہ تصور کیا جائے گا۔ نائب وزیر اعلی نے اس بات کا اعادہ کیا کہ ریاست کا درجہ دینے کا مطالبہ لوگوں کے جذبات اور امنگوں کی عکاسی کرتا ہے اور سماج کے تمام طبقات سے مطالبہ کیا کہ وہ اس مقصد کی حمایت میں متحد ہوجائیں۔ یہ باتیں انہوں نے بانڈی پورہ ضلع کے ترقیاتی دورے کے دوران میڈیا سے بات چیت کے دوران کی ۔ واضح رہے سریندر کمار چودھری نے بدھ کے روز بانڈی پورہ ضلع کا ایک وسیع دورہ کیا تاکہ کئی جاری ترقیاتی منصوبوں کی پیش رفت کا جائزہ لیا جا سکے اور مختلف عوامی مسائل کے بارے میں مقامی باشندوں سے بات چیت کی جا سکے۔ دورے کے دوران نائب وزیر اعلیٰ نے نانیارا-سمبل فٹ برج اور نانیارا-بانڈی پورہ پل پر جاری تعمیراتی کام کا معائنہ کیا۔ انہوں نے کام کی رفتار اور معیار کا جائزہ لیا اور کنیکٹیویٹی کو بہتر بنانے اور عوامی سہولت کو یقینی بنانے کے لیے ان اہم بنیادی ڈھانچے کے منصوبوں کو مقررہ مدت کے اندر مکمل کرنے کی اہمیت پر زور دیا۔ چودھری نے سدرکوٹ بالا کا بھی دورہ کیا، جہاں انہوں نے پتھر کی کانوں سے متعلق مسائل کے بارے میں مقامی باشندوں سے بات چیت کی۔ انہوں نے لوگوں کو یقین دلایا کہ حکومت ان کے تحفظات کو دور کرنے اور کان سے متعلق مسائل کا مناسب حل تلاش کرنے کے لیے پرعزم ہے۔ بعد میں انہوں نے گاروڑہ بانڈی پورہ پل کا معائنہ کیا اور جاری کام کی حالت کا جائزہ لیا۔ہندوستھان سماچار

ہندوستان سماچار / Aftab Ahmad Mir