ورلڈ کپ سے پہلے آخری پریکٹس میچ میں ارجنٹینا نے آئس لینڈ کو 0-3 سے ہرایا

آبرن، 10 جون (ہ س)۔ موجودہ ورلڈ چیمپئن ارجنٹینا نے ورلڈ کپ سے پہلے اپنے آخری پریکٹس مقابلے میں بدھ کے روز آئس لینڈ کو 0-3 سے ہرا کر شاندار تیاری کا اشارہ دیا ہے۔

امریکہ کی ریاست الاباما کے آبرن میں واقع جارڈن-ہیئر اسٹیڈیم میں کھیلے گئے مقابلے میں لیونل میسی نے بینچ سے اتر کر پنالٹی پر گول داغا اور ٹیم کی جیت کو یادگار بنا دیا۔

ارجنٹینا نے مقابلے کے آغاز سے ہی جارحانہ کھیل دکھایا۔ میچ کے پہلے 10 منٹ کے اندر ویلنٹین بارکو نے شاندار گول کر کے ٹیم کو ابتدائی برتری دلا دی۔

دوسرے ہاف میں تقریباً 20 منٹ باقی رہتے ہوئے لیونل میسی میدان پر اترے۔ کچھ ہی منٹ بعد ارجنٹینا کو پنالٹی ملی، جب لاوتارو مارٹنیز کو باکس کے اندر فاول کیا گیا۔ میسی نے موقع کا پورا فائدہ اٹھاتے ہوئے گیند کو جال میں پہنچا دیا۔ یہ گول میسی کے لیے خاص رہا کیونکہ سال 2018 کے ورلڈ کپ میں آئس لینڈ کے خلاف ہی وہ پنالٹی چوک گئے تھے۔ اس بار انہوں نے اسی حریف کے خلاف گول کر کے پرانی یاد کو پیچھے چھوڑ دیا۔

ارجنٹینا نے میچ کے آخری مرحلے میں اپنی برتری مزید مضبوط کر لی۔ 86 ویں منٹ میں تھیاگو الماڈا نے روڈریگو ڈی پال کے شاندار پاس پر گول کر کے اسکور 0-3 کر دیا۔

پورے مقابلے میں ارجنٹینا نے گیند پر اپنا کنٹرول برقرار رکھا اور آئس لینڈ کو واپسی کا کوئی موقع نہیں دیا۔ اس جیت کے ساتھ ہی ٹیم نے ورلڈ کپ مہم سے پہلے اپنے اعتماد میں اضافہ کیا ہے۔ اب ارجنٹینا اپنی ورلڈ کپ مہم کا آغاز 16 جون کو کنساس سٹی میں الجزائر کے خلاف کرے گی۔

ہندوستھان سماچار

--------------

ہندوستان سماچار / انظر حسن