ماسکو، 10 جون (ہ س)۔

ایران نے بدھ کے روز خلیجی ممالک کو خبردار کیا کہ وہ امریکہ کو ایران کے خلاف حملوں کے لیے اپنی سرزمین استعمال کرنے سے روکیں ورنہ ایران اپنے دفاع میں ان کی تنصیبات کو نشانہ بنانے سے دریغ نہیں کرے گا۔ ایران نے یہ بھی کہا کہ ایران پر رات گئے امریکی حملہ اقوام متحدہ کے چارٹر کی سنگین خلاف ورزی ہے۔

پریس ٹی وی چینل کی رپورٹ کے مطابق ایرانی وزارت خارجہ کے ایک سینئر اہلکار نے امریکی فوجی جارحیت کے جرم کی شدید مذمت کرتے ہوئے کہا کہ ایران ایک بار پھر خطے کے تمام ممالک بالخصوص خلیج فارس کے جنوبی ساحلوں پر واقع ممالک کو اپنی قانونی اور اخلاقی ذمہ داری یاد دلاتا ہے کہ وہ اپنی سرزمین اور تنصیبات کو امریکی افواج اور اسرائیل کی جانب سے ایران کے خلاف منصوبہ بندی، منظم، جارحیت یا کارروائی کی حمایت کے لیے استعمال کرنے سے روکیں۔

وزارت خارجہ نے اس بات پر زور دیا کہ ایران اپنے دفاع کے حق کو استعمال کرنے میں ہچکچاہٹ محسوس نہیں کرے گا، جس میں حملوں کے ذرائع کے ساتھ ساتھ ایران کے خلاف جارحانہ مہموں کے آپریشن اور حمایت کے لئے استعمال کئے جانے والے ٹھکانوں اور رسد سہولتوں پر حملہ کرنا شامل ہے ۔ وزارت نے اقوام متحدہ، اس کی سلامتی کونسل اور سیکرٹری جنرل کی بین الاقوامی امن و سلامتی کی حفاظت اور خلاف ورزی کرنے والوں کو جوابدہ ٹھہرانے کی ذمہ داری کی طرف بھی اشارہ کیا۔

امریکی سینٹرل ملٹری کمانڈ (سینٹ کام) نے منگل کی رات کہا کہ امریکی افواج نے اپاچی ہیلی کاپٹر پر حملے کے جواب میں ایران کے خلاف حملے مکمل کر لیے ہیں۔ سینٹ کام کے مطابق، آپریشن میں ایرانی فضائی دفاعی تنصیبات، زمینی کنٹرول اسٹیشنوں اور آبنائے ہرمز کے قریب نگرانی کرنے والے ریڈار سائٹس کو نشانہ بنایا گیا۔

امریکی صدر ڈونالڈ ٹرمپ نے منگل کے روز کہا کہ ایران نے امریکی اے ایچ 64 اپاچی ہیلی کاپٹر کو مار گرایا جو عمان کے ساحل پر گر کر تباہ ہو گیا تھا اور امریکہ جواب دینے کا پابند ہے۔ اپاچی ہیلی کاپٹر کے دونوں پائلٹس کو بچا لیا گیا۔ سینٹ کام نے اس واقعے کے بعد ایران کے خلاف جوابی حملے شروع کرنے کا اعلان کیا۔

ہندوستھان سماچار

ہندوستان سماچار / عطاءاللہ