نئی دہلی، 10 جون (ہ س ): مرکزی حکومت نے مائیکرو فنانس اداروں (ایم ایف آئی) کے لیے کریڈٹ گارنٹی اسکیم 2.0 کی مدت میں توسیع کی منظوری دے دی ہے۔ اب یہ اسکیم 31 اگست تک یا 20 ہزار کروڑ روپے کی گارنٹی جاری ہونے تک مؤثر رہے گی۔

وزارتِ خزانہ کے مطابق حکومت نے اس اسکیم کے تحت زیادہ سے زیادہ قرض کی حد کو 300 کروڑ روپے سے بڑھا کر 1000 کروڑ روپے کر دیا ہے، جو ایسیٹس اَنڈر مینجمنٹ کے 20 فیصد کی مجموعی بالائی حد کے اندر ہوگی۔ اب تک اس اسکیم کے تحت مجموعی طور پر 770 کروڑ روپے کے قرضوں کی منظوری دی جا چکی ہے۔

اس اسکیم کا مقصد نیشنل کریڈٹ گارنٹی ٹرسٹی کمپنی لمیٹڈ کے ذریعے کریڈٹ گارنٹی سپورٹ فراہم کر کے مائیکرو فنانس اداروں کی قرض فراہم کرنے کی صلاحیت کو مضبوط بنانا اور نان بینکنگ فنانشل کمپنی-مائیکرو فنانس انسٹی ٹیوشنز کو 20 ہزار کروڑ روپے تک کے قرضوں کی سہولت فراہم کرنا ہے۔

حکومت کا ماننا ہے کہ اسکیم کی مدت میں توسیع اور بڑے حجم کی این بی ایف سی-ایم ایف آئی کے لیے زیادہ سے زیادہ قرض کی حد میں اضافے سے مائیکرو فنانس شعبے میں قرضوں کے بہاؤ میں نمایاں اضافہ ہوگا، جس سے چھوٹے قرض لینے والوں کو بھی فائدہ پہنچے گا۔

مرکزی حکومت نے 20 مارچ کو -2.0 اسکیم نافذ کی تھی۔ اس اسکیم کا مقصد نیشنل کریڈٹ گارنٹی ٹرسٹی کمپنی لمیٹڈ کے ذریعے بینکوں اور مالیاتی اداروں کو ایسی ضمانت فراہم کرنا ہے جو این بی ایف سی-ایم ایف آئی اور دیگر مائیکرو فنانس اداروں کی جانب سے چھوٹے قرض لینے والوں کو دیے گئے قرضوں پر ممکنہ نقصانات کے خلاف تحفظ فراہم کرے۔

ہندوستھان سماچار

---------------

ہندوستان سماچار / عبدالواحد