خاتون تعلقہ اہلکار دس ہزار روپے رشوت لیتے رنگے ہاتھوں گرفتارناسک، 10 جون (ہ س)۔ ضلع ناسک کے تعلقہ بگلان کے برہمن گاؤں میں تعینات خاتون تعلقہ اہلکار (تلاٹھی) منیشا نارائن باوسکر (عمر 36 سال) کو اینٹی کرپشن بیورو نے ستانہ تحصیل دفتر میں دس ہزار روپے رشوت قبول کرتے ہوئے رنگے ہاتھوں گرفتار کر لیا۔ اس معاملے میں ستانہ پولیس اسٹیشن میں انسدادِ بدعنوانی قانون کے تحت مقدمہ درج کرنے کی کارروائی جاری ہے۔شکایت کنندہ کی برہمن گاؤں میں واقع زرعی زمین کے گروپ نمبر 824 پر بھاؤ صاحب ہیرے ویویدھ کاریہ کاری سہکاری سیوا سنستھا، برہمن گاؤں کا چار لاکھ روپے کا قرض درج تھا۔ یہ قرض قرض معافی اسکیم کے تحت کم نہیں ہوا تھا۔ اسی کے ساتھ وراثتی اندراج کے دوران غلطی سے درج ہونے والے نام کی سرکاری ریکارڈ میں اصلاح کے لیے بھی درخواست دی گئی تھی۔الزام ہے کہ یہ دونوں کام انجام دینے کے عوض تلاٹھی منیشا باوسکر نے اپنے لیے اور منڈل افسر کے لیے مجموعی طور پر دس ہزار روپے رشوت طلب کی۔ اس سلسلے میں اینٹی کرپشن بیورو کے پاس شکایت درج کرائی گئی تھی۔ بعد ازاں 27 اپریل کو کی گئی جانچ کے دوران یہ بات سامنے آئی کہ منیشا باوسکر نے ستانہ کے جیجا ماتا مراٹھا ہائی اسکول میں مردم شماری کی تربیت کے موقع پر اور بعد میں تحصیل دفتر میں بھی رشوت کا مطالبہ کیا تھا اور رقم قبول کرنے پر آمادگی ظاہر کی تھی۔ تاہم تحقیقات میں یہ ثابت نہیں ہو سکا کہ منڈل افسر نے کسی قسم کی رشوت طلب کی تھی۔اس کے بعد اینٹی کرپشن بیورو نے منگل کے روز جال بچھایا اور ستانہ تحصیل دفتر میں شکایت کنندہ سے دس ہزار روپے رشوت وصول کرتے وقت منیشا باوسکر کو پنچ گواہوں کی موجودگی میں رنگے ہاتھوں گرفتار کر لیا۔ یہ کارروائی پولیس ڈپٹی سپرنٹنڈنٹ سواتی پوار کی رہنمائی میں انجام دی گئی، جبکہ مزید تفتیش پولیس انسپکٹر روپالی کھانڈوی کر رہی ہیں۔ہندوستھان سماچار

ہندوستان سماچار / جاوید این اے