کم عمر لڑکے پر فائرنگ کا معاملہ بے نقاب، نیرل پولیس کی فوری کارروائی میں ملزم گرفتار

رائے گڑھ، 10 جون (ہ س)۔ نیرل پولیس اسٹیشن کی حدود میں ایک کم عمر لڑکے پر فائرنگ کے سنگین معاملے کا نیرل پولیس نے کامیابی سے پردہ فاش کرتے ہوئے ملزم کو گرفتار کر لیا ہے۔ پولیس کی بروقت اور مؤثر کارروائی کے بعد علاقے میں اس معاملے کی خاصی چرچا ہو رہی ہے اور تفتیشی ٹیم کی کارکردگی کو سراہا جا رہا ہے۔ پولیس کے مطابق 3 جون 2026 کو شام تقریباً پانچ بجے نیرل علاقے میں ایک کم عمر لڑکا اپنے گھر کے قریب کھیل رہا تھا۔ اسی دوران ایک نامعلوم شخص نے جنگلی جانوروں کا شکار کرنے کے ارادے سے بندوق سے فائر کیا۔ فائر کی گئی گولی اتفاقاً لڑکے کو جا لگی جس کے نتیجے میں اس کی دونوں رانوں اور دونوں ہاتھوں پر چوٹیں آئیں۔ زخمی لڑکے کو فوری طور پر علاج کے لیے اسپتال منتقل کیا گیا۔

واقعے کی سنگینی کو مدنظر رکھتے ہوئے نیرل پولیس اسٹیشن میں بھارتیہ نیائے سنہتا کی دفعات 125، 125 (اے) اور بھارتی اسلحہ قانون کی متعلقہ دفعات کے تحت مقدمہ درج کیا گیا۔ بعد ازاں ملزم کی تلاش کے لیے ایک خصوصی تفتیشی ٹیم تشکیل دی گئی۔ رائے گڑھ ضلع کی پولیس سپرنٹنڈنٹ آنچل دلال، ایڈیشنل پولیس سپرنٹنڈنٹ ابھیجیت شِوتھرے اور کرجت ڈویژن کے سب ڈویژنل پولیس افسر راہل گائیکر کی رہنمائی میں نیرل پولیس نے تفتیش کا دائرہ وسیع کیا۔ تکنیکی تجزیے، خفیہ معلومات اور مقامی سطح پر کی گئی جانچ کی بنیاد پر مشتبہ شخص تک رسائی حاصل کی گئی۔

تفتیش کے دوران ملزم سے تفصیلی پوچھ گچھ کی گئی، جس میں اس نے جرم کا اعتراف کر لیا۔ اعتراف کے بعد پولیس نے اسے گرفتار کر لیا اور واردات میں استعمال ہونے والی بندوق بھی ضبط کر لی۔ اس کارروائی کے ساتھ ہی پولیس نے اس کیس کو کامیابی سے حل کرنے کا دعویٰ کیا ہے۔اس پوری کارروائی میں پولیس سب انسپکٹر اور تفتیشی افسر سشیل کاجلیکر کی قیادت میں پولیس حوالدار راجارام پنگلے، مہیش کھنڈاگلے، سچن واگھمارے، نلیش کونڈھار اور پولیس اہلکار راجے بھاؤ کیکان، آشو بیندرے، ونود وانگیکر اور کشل کالوکھے نے اہم کردار ادا کیا۔ ٹیم نے مسلسل کوششوں کے ذریعے ملزم کا سراغ لگا کر اسے گرفتار کرنے میں نمایاں کامیابی حاصل کی۔

پولیس حکام کا کہنا ہے کہ اس واقعے نے ایک بار پھر غیر قانونی شکار کے لیے کی جانے والی فائرنگ کے خطرات کو اجاگر کیا ہے۔ ایسے واقعات کی روک تھام اور قانون شکنی میں ملوث افراد کے خلاف آئندہ بھی سخت کارروائی جاری رکھی جائے گی۔

ہندوستھان سماچار

--------------------

ہندوستان سماچار / جاوید این اے