لاتور، ممبئی ، 10 جون (ہ س)۔ دیہی علاقوں میں قائم سولر منصوبوں، کسانوں کے کھیتوں میں نصب شمسی توانائی کے آلات، کاپر وائر، برقی کیبلز اور دیگر قیمتی سامان چوری کرنے والی ایک بین الاضلاع گروہ کا مقامی کرائم برانچ نے پردہ فاش کر دیا ہے۔ اس کارروائی کے دوران 13 مختلف جرائم کا انکشاف ہوا جبکہ 16 لاکھ 59 ہزار روپے مالیت کا مالِ مسروقہ ضبط کیا گیا ہے۔پولیس سپرنٹنڈنٹ امول تامبے کی ہدایت پر ایڈیشنل پولیس سپرنٹنڈنٹ منگیش چوہان کی نگرانی اور مقامی کرائم برانچ کے پولیس انسپکٹر سدھاکر باوکر کی قیادت میں املاک کے خلاف جرائم میں ملوث ملزمین کی تلاش جاری تھی۔ اسی دوران 9 جون کو خفیہ اطلاع کی بنیاد پر کرائم برانچ کی ٹیم نے فائیو نمبر چوک علاقے میں جال بچھا کر دو مشتبہ افراد کو حراست میں لیا۔گرفتار ملزمین کی شناخت بالاجی ارون کالے، ساکن سرم کنڈی پھاٹا، تعلقہ واشی، ضلع دھاراشیو، اور آکاش عرف بھیا نوناتھ پوار، ساکن سورڈی، تعلقہ کیج، ضلع بیڈ، حال مقیم شیراڈھون پاردھی پیڑھی، ضلع دھاراشیو، کے طور پر ہوئی ہے۔ ملزمان کے قبضے میں موجود ٹاٹا وسٹا کار کی تلاشی کے دوران گاڑی میں رکھی ایک تھیلی سے 11 لاکھ 9 ہزار روپے نقد برآمد ہوئے۔ اس رقم کے بارے میں تفصیلی پوچھ گچھ کی گئی تو ملزمین نے اعتراف کیا کہ انہوں نے لاتور ضلع کے مختلف علاقوں میں سولر پینل، کاپر وائر، کیبل وائر، برقی سامان اور بورویل موٹروں کی چوری کی متعدد وارداتیں انجام دی ہیں۔تحقیقات کے دوران ملزمین نے اپنے مزید ساتھیوں کے نام بھی ظاہر کیے، جن میں ارون عرف بلی باریک راو کالے، پنٹو مچھندر کالے، سنیل ببن شندے اور شام عرف انیل ببن شندے شامل ہیں۔ پولیس ان تمام مفرور ملزمین کی تلاش میں مصروف ہے۔ پولیس تفتیش میں یہ بات سامنے آئی کہ اس ٹولی نے مورڈ، بھادا، چاکور، اوسا، ریناپور، اُدگیر اور ایم آئی ڈی سی لاتور کے علاقوں میں سولر پینل، کاپر وائر، برقی کیبلز اور دیگر سامان چرا کر خاطر خواہ مالی فائدہ حاصل کیا تھا۔ پولیس ریکارڈ کی جانچ کے بعد مجموعی طور پر 13 جرائم کا سراغ لگایا گیا۔ ان میں مورڈ پولیس اسٹیشن کے 3، بھادا کے 2، چاکور کے 2، اوسا کے 2، ریناپور کے 2، ایم آئی ڈی سی لاتور کا ایک اور اُدگیر دیہی پولیس اسٹیشن کا ایک مقدمہ شامل ہے۔

کارروائی کے دوران ملزمان سے چوری شدہ سامان کی فروخت سے حاصل ہونے والی 11 لاکھ 9 ہزار روپے نقد رقم، جرم میں استعمال ہونے والی ٹاٹا وسٹا کار جس کی مالیت تقریباً 5 لاکھ روپے بتائی گئی ہے، اور ہیرو ایچ ایف ڈیلکس موٹر سائیکل جس کی قیمت تقریباً 50 ہزار روپے ہے، ضبط کی گئی۔ اس طرح مجموعی طور پر 16 لاکھ 59 ہزار روپے مالیت کا سامان پولیس نے اپنے قبضے میں لیا۔

گرفتار ملزمان کو حراست میں لے کر مورڈ پولیس اسٹیشن میں درج جرم نمبر 73/2026 کے تحت مزید قانونی کارروائی کے لیے پیش کیا گیا ہے، جبکہ مفرور ملزمان کی گرفتاری کے لیے خصوصی پولیس ٹیمیں روانہ کر دی گئی ہیں۔

ہندوستھان سماچار

--------------------

ہندوستان سماچار / جاوید این اے