ممبئی شمال مغربی لوک سبھا حلقے میں 11 جون متعدد ترقیاتی منصوبوں کا افتتاح

۔ نائب وزیر اعلیٰ ایکناتھ شندے شرکت ، متاثرہ خاندانوں میں مکانات کی چابیاں تقسیم کی جائیں گی

ممبئی ، 10 جون (ہ س)۔ ممبئی شمال مغربی لوک سبھا حلقے میں مختلف ترقیاتی اور خوبصورتی بڑھانے والے منصوبوں کا افتتاح 11 جون 2026 کو شیو سینا کے سربراہ اور مہاراشٹر کے نائب وزیر اعلیٰ ایکناتھ شندے کے ہاتھوں انجام پائے گا۔ اس موقع پر حلقے کے رکن پارلیمان رویندر وائیکر کی جانب سے شروع کیے گئے متعدد عوامی فلاحی منصوبے عوام کے لیے وقف کیے جائیں گے۔

رویندر وائیکر نے کہا کہ شمال مغربی ممبئی کے عوام نے بطور کارپوریٹر، رکن اسمبلی اور اب رکن پارلیمان ان پر جو اعتماد ظاہر کیا ہے، اس پر پورا اترنے کے لیے وہ بنیادی ڈھانچے کو مضبوط بنانے کے ساتھ ساتھ علاقے کی خوبصورتی برقرار رکھنے اور اسے مزید بہتر بنانے کے لیے مختلف جدید ترقیاتی منصوبے نافذ کر رہے ہیں۔ افتتاحی پروگرام کے تحت گورے گاؤں (مشرقی) میں آرے چیک ناکہ کے قریب مغربی ایکسپریس ہائی وے کی توسیع کے منصوبے سے متاثر ہونے والے سروودیہ نگر کے تقریباً 70 رہائشیوں میں پہلے مرحلے کے تحت مکانات کی چابیاں تقسیم کی جائیں گی۔

اس کے علاوہ جوگیشوری (مشرقی) کے اِچھاپورتی گنیش مندر اور شیم نگر تالاب کے اطراف تزئین و آرائش کے کام مکمل کیے گئے ہیں۔ جوگیشوری-وکرولی لنک روڈ کے نزدیک واقع شیم نگر تالاب پر اولیائے کرام کی زندگی اور خدمات کی عکاسی کرنے والی معلوماتی دیواری تصاویر بھی نصب کی گئی ہیں۔ ایم ایم آر ڈی اے کے تحت درگا نگر میں میٹرو کوچ کی طرز پر تعمیر کردہ ایک جدید لائبریری بھی عوام کے لیے کھولی جائے گی۔ اسی طرح ہندو ہردے سمراٹ شیو سینا پرمکھ بالاصاحب ٹھاکرے ٹراما میونسپل اسپتال کے قریب قائم کثیر المقاصد عوامی بیت الخلا، صفائی مرکز اور سروس فیسلٹی سینٹر کا بھی افتتاح کیا جائے گا۔

اس جدید عوامی سہولت مرکز میں خواتین اور مردوں کے لیے الگ بیت الخلا، کپڑے دھونے اور سکھانے کی سہولت، غسل خانے، رات کے قیام کے لیے تقریباً 32 بنکر بیڈ، شیر خوار بچوں کو دودھ پلانے کے لیے ’’ہیرکنی کمرہ‘‘ اور کپڑوں پر استری کرنے کی سہولت بھی فراہم کی گئی ہے۔ افتتاحی تقریبات کا آغاز شام 5 بجے کے بعد ٹراما اسپتال کے مقام سے ہوگا۔ منتظمین نے شمال مغربی ممبئی کے شہریوں سے اپیل کی ہے کہ وہ اس ترقیاتی تقریب میں بڑی تعداد میں شرکت کریں۔

ہندوستھان سماچار

--------------------

ہندوستان سماچار / جاوید این اے