کولکاتا، 6 مئی (ہ س)۔ مغربی بنگال اسمبلی انتخابات میں بھاری اکثریت سے کامیابی کے بعد نئی حکومت کی حلف برداری کی تقریب کو شاندار بنانے کی تیاریاں شروع ہو گئی ہیں۔ بھارتیہ جنتا پارٹی (بی جے پی) کے ریاستی صدر اور راجیہ سبھا کے رکن اسمبلی شمک بھٹاچاریہ نے بدھ کو بریگیڈ پریڈ گراو¿نڈ میں ایک شاندار حلف برداری کی تقریب کا اعلان کیا۔ انہوں نے کہا کہ وزیر اعظم نریندر مودی، مرکزی وزیر داخلہ امت شاہ، پارٹی کے قومی صدر نتن نوین، کئی سینئر لیڈران اور تقریباً 20 ریاستوں کے وزرائے اعلیٰ اس تقریب میں شرکت کریں گے۔

شمک بھٹاچاریہ نے بتایا کہ ریاست کے نئے وزیر اعلیٰ کی حلف برداری کی تقریب رابندر جینتی کے موقع پر 9 مئی کو کولکاتا کے بریگیڈ پریڈ گراو¿نڈ میں منعقد ہوگی۔ ملک بھر سے کئی اہم شخصیات کی شرکت متوقع ہے۔ بی جے پی قانون ساز پارٹی کی میٹنگ 8 مئی کی شام کو بلائی گئی ہے جہاں قانون ساز پارٹی کے لیڈر کا انتخاب کیا جائے گا۔

حلف برداری کی تقریب کی تیاریوں میں بی جے پی قیادت سرگرم ہوگئی ہے۔ اس سلسلے میں بی جے پی کے ریاستی صدر شمک بھٹاچاریہ، قومی جنرل سکریٹری اور دیگر قائدین کولکاتا پہنچے، جہاں انہوں نے ریاست کے چیف سکریٹری سے ملاقات کی تاکہ تقریب کی تیاریوں پر تبادلہ خیال کیا جاسکے۔ ریاستی بی جے پی لیڈر جیوترموئے مہتو اور سومترا خان بھی موجود تھے۔

نوان پہنچنے سے پہلے، شمک بھٹاچاریہ نے انتخابات کے بعد ہونے والے تشدد پر بھی سخت تنقید کی۔ انہوں نے واضح طور پر کہا کہ ووٹ کے بعد کسی بھی قسم کے تشدد کو برداشت نہیں کیا جائے گا اور بی جے پی ترنمول کانگریس جیسی سیاسی ثقافت کو قبول نہیں کرے گی۔ انہوں نے یہ بھی کہا کہ اگر کوئی بی جے پی کا جھنڈا لے کر کسی پر حملہ کرتا ہے تو پارٹی اس کی ذمہ داری قبول نہیں کرے گی، کیونکہ بی جے پی ابھی اقتدار میں نہیں آئی ہے۔

جہاں ایک طرف ریاست میں نئی حکومت کی تشکیل اور حلف برداری کی تیاریاں زوروں پر ہیں، وہیں دوسری طرف انتخابات کے بعد ہونے والے تشدد کو لے کر سیاست بھی تیز ہو گئی ہے۔

ہندوستھان سماچار

ہندوستان سماچار / محمد شہزاد