چنئی، 6 مئی (ہ س):۔

تمل ناڈو میں حکومت سازی کے لیے کانگریس کی حمایت کا اعلان کرنے کے بعد تمل ناڈو ویٹری کزگم (ٹی وی کے ) کے لیے راستہ صاف ہو گیا ہے۔ بدھ کی سہ پہر،ٹی وی کے لیڈر وجے نے گورنر راجندر وشو ناتھ آرلیکر سے ملاقات کی اور حکومت بنانے کا دعویٰ پیش کیا۔

اس اسمبلی انتخابات کے نتائج نے ریاست کی سیاست میں ایک بڑی تبدیلی لائی ہے۔ تمل ناڈو کے لوگوں نے اے آئی اے ڈی ایم کے اور ڈی ایم کے کو مستردکرتے ہوئے ریاست کی نئی پارٹی ٹی وی کے کی زبردست حمایت کی۔ تاہم، کسی بھی پارٹی کو واضح اکثریت حاصل نہ ہونے کی وجہ سے ایک معلق اسمبلی سامنے آئی۔ نتیجتاً، ریاست میں سب سے بڑی پارٹی کے طور پر ابھرنے والی ٹی وی کے کو کانگریس کی حمایت نے مخلوط حکومت کی تشکیل کا راستہ صاف کر دیا۔ ایک نئی پیشرفت میں،ٹی وی کے لیڈر وجے آج راج بھون پہنچے اور گورنر راجیندر وشو ناتھ ارلیکر سے ملاقات کی۔

ملاقات کے دوران گورنر نے وجے کو شال اور یادگاری تحفہ پیش کرتے ہوئے مبارکباد دی۔ اس کے بعد وجے نے حکومت سازی کی دعوت دینے کی درخواست کی اور حمایتی ایم ایل اے کے خطوط گورنر کو پیش کیے۔ اس میٹنگ کے دوران ٹی وی کے کے لیڈر پسی آنند، سینگوٹئن اور آدو ارجنا بھی موجود تھے۔ مانا جا رہا ہے کہ حلف برداری کی تقریب جمعرات کو صبح 11:30 بجے ہوگی اور لوک سبھا میں اپوزیشن لیڈر راہل گاندھی بھی اس میں شرکت کر سکتے ہیں۔ سرکاری معلومات کا ابھی انتظار ہے۔

ہندوستھان سماچار

ہندوستان سماچار / عطاءاللہ