کولکاتا، 31 مئی (ہ س)۔ مغربی بنگال کی سیاست میں ایک نیا تنازعہ اس وقت کھڑا ہوگیا جب سابق وزیر اعلیٰ اور ترنمول کانگریس کی سربراہ ممتا بنرجی کا ایک ویڈیو منظر عام پر آیا جس میں بیل ویو کلینک کے سی ای او پردیپ ٹنڈن سے ناراضگی کا اظہار کیا گیا اور ابھیشیک بنرجی کو اسپتال میں داخل کرنے سے انکار پر سخت ردعمل کا اظہار کیا۔

ویڈیو جاری ہونے کے بعد اپوزیشن نے وزیر اعلیٰ کو نشانہ بنایا ہے۔ بی جے پی لیڈروں کا الزام ہے کہ ممتا بنرجی جنہوں نے ہفتہ کی رات اسپتال انتظامیہ پر بی جے پی اور پولیس حکام کے دباو کا الزام لگایا تھا، اب وہ اسپتال کے اعلیٰ حکام پر دباو ڈالتی نظر آ رہی ہیں۔

بی جے پی ایم ایل اے ترون جیوتی تیواری نے ویڈیو شیئر کیا اور سابق وزیر اعلیٰ پر حملہ کرتے ہوئے الزام لگایا کہ ممتا بنرجی طویل عرصے سے جھوٹ کی سیاست کر رہی ہیں اور انتخابی ناکامیوں کے باوجود ان کا رویہ نہیں بدلا ہے۔

اطلاعات کے مطابق سونار پور میں احتجاج کے دوران پیش آنے والے واقعے کے بعد ابھیشیک بنرجی کو ابتدائی طور پر کولکاتا کے اپولو اسپتال لے جایا گیا تھا۔ وہاں کے ڈاکٹروں نے انہیں اسپتال میں ایڈمٹ کرنے کی ضرورت نہیں سمجھی۔ اس کے بعد انہیں بیل ویو کلینک لے جایا گیا۔

ہفتہ کی رات اسپتال کے باہر میڈیا سے بات کرتے ہوئے ممتا بنرجی نے الزام لگایا تھا کہ بیل ویو کلینک کے چیف ایگزیکٹیو آفیسر پردیپ ٹنڈن پر جنوبی کولکاتا کے ڈپٹی کمشنر آف پولیس کی جانب سے دباو ڈالا جارہا تھا اور بی جے پی کے اثر و رسوخ کی وجہ سے ابھیشیک کو ایڈمٹ نہیں کیا گیا۔

تاہم اتوار کو اس ویڈیو کے منظر عام پر آنے کے بعد بی جے پی اور دیگر اپوزیشن جماعتوں نے جوابی حملہ کیا ہے۔ ان کا کہنا ہے کہ اگر ڈاکٹروں نے طبی بنیادوں پر داخلہ ضروری نہیں سمجھا تو اسپتال انتظامیہ پر کوئی دباو ڈالنا مناسب نہیں۔

وہیں، بیل ویو کلینک کی میڈیکل رپورٹ میں کہا گیا ہے کہ 38 سالہ ابھیشیک بنرجی کی صحت نارمل ہے۔ معائنے میں کسی سنگین چوٹ کے آثار نہیں ملے اور صرف سینے پر معمولی چوٹ آئی ہے۔ ڈاکٹروں نے اسپتال میں ایڈمٹ ہونے کی ضرورت نہیں سمجھی اور کچھ دن آرام اور ادویات کا مشورہ دیا۔

اس ویڈیو نے ریاست میں الزامات اور جوابی الزامات کی سیاسی جنگ چھیڑ دی ہے۔ اس تنازعہ اور وائرل ویڈیو کے حوالے سے فی الحال اسپتال انتظامیہ کی جانب سے کوئی سرکاری ردعمل سامنے نہیں آیا ہے۔

---------------

ہندوستان سماچار / عبدالسلام صدیقی