جموں، 31 مئی (ہ س)۔

جموں و کشمیر کے نائب وزیر اعلیٰ سریندر چودھری نے جموں کے گریٹر کیلاش علاقے میں نالے پر تعمیر کیے گئے نئے ڈبل لین پل کا افتتاح کیا۔ اس موقع پر انہوں نے کہا کہ جموں و کشمیر میں بنیادی ڈھانچے کو مضبوط بنانے اور بہتر رابطہ نظام فراہم کرنے کے لیے حکومت ترجیحی بنیادوں پر کام کر رہی ہے۔انہوں نے کہا کہ نئے پل کی تعمیر سے گریٹر کیلاش اور ملحقہ علاقوں کے رہائشیوں کو آمد و رفت میں آسانی ہوگی، ٹریفک کی روانی بہتر ہوگی اور عوام کو بہتر سفری سہولیات میسر آئیں گی۔نائب وزیر اعلیٰ نے کہا کہ حکومت عوام دوست ترقیاتی منصوبوں کے ذریعے جموں و کشمیر میں متوازن اور جامع ترقی کو یقینی بنانے کے لیے پرعزم ہے۔

انہوں نے مزید کہا کہ سڑکوں، پلوں اور دیگر بنیادی سہولیات کی تعمیر و توسیع سے نہ صرف عوامی سہولتوں میں اضافہ ہوگا بلکہ خطے کی سماجی و اقتصادی ترقی کو بھی فروغ ملے گا۔اس موقع پر محکمہ آر اینڈ بی کے چیف انجینئر اور دیگر اعلیٰ افسران بھی موجود تھے، جنہوں نے نائب وزیر اعلیٰ کو منصوبے کی تفصیلات اور جاری ترقیاتی کاموں کے بارے میں آگاہ کیا۔

مقامی باشندوں نے پل کی تکمیل پر خوشی کا اظہار کرتے ہوئے حکومت کی جانب سے بنیادی ڈھانچے کی بہتری کے اقدامات کو سراہا۔

ہندوستھان سماچار

ہندوستان سماچار / محمد اصغر