نیو چنڈی گڑھ، 30 مئی (ہ س)۔ راجستھان رائلز کے ہیڈ کوچ اور کرکٹ ڈائریکٹر کمار سنگکارا کا ماننا ہے کہ نوجوان بلے باز ویبھو سوریا ونشی کو جلد ہی ہندوستانی ٹیم میں جگہ مل سکتی ہے۔

انہوں نے کہا کہ آئی پی ایل 2026 میں جس طرح ویبھو نے دنیا کے بہترین گیند بازوں کے خلاف بلے بازی کی ہے، اس سے ثابت ہوتا ہے کہ وہ بڑے درجے کے چیلنجوں کے لیے پوری طرح تیار ہیں۔

کوالیفائر-2 میں گجرات ٹائٹنز کے خلاف شکست کے باوجود 15 سالہ ویبھو سوریا ونشی نے 47 گیندوں پر 96 رنوں کی شاندار اننگز کھیلی۔ اس کے ساتھ ہی انہوں نے ٹورنامنٹ کا اختتام اورینج کیپ فاتح کے طور پر کیا۔ گزشتہ چار میچوں میں یہ ان کی تیسری 90 سے زیادہ رنوں کی اننگز تھی۔

میچ کے بعد منعقدہ پریس کانفرنس میں سنگکارا نے کہا کہ راجستھان رائلز کو ویبھو کی کارکردگی پر بیحد فخر ہے اور فرینچائزی یہ یقینی بنانا چاہتی ہے کہ وہ آگے بھی اپنے بہترین کھیل اور مثبت سوچ کو برقرار رکھیں۔

ویبھو کے ہندوستانی ٹیم میں انتخاب کے امکانات پر سنگکارا نے کہا، ’’کسی کھلاڑی کے تیار ہونے کا صحیح اندازہ تبھی ہوتا ہے جب وہ بڑے درجے پر کھیلتا ہے۔ لیکن ویبھو نے اب تک جو دکھایا ہے، اس سے مجھے لگتا ہے کہ وہ کسی بھی چیلنج کا سامنا کرنے کے لیے تیار ہے۔ مجھے پورا یقین ہے کہ اسے بہت جلد ہندوستانی ٹیم سے بلاوا آئے گا۔‘‘

سنگکارا نے کہا کہ گجرات ٹائٹنز کے خلاف ویبھو کی 96 رنوں کی اننگز ان کی پختگی کا ثبوت تھی۔ انہوں نے بتایا کہ استعمال شدہ دھیمی پچ پر اور لگاتار وکٹیں گرنے کے درمیان یہ اننگز کھیلنا آسان نہیں تھا۔

انہوں نے کہا، ’’ویبھو حالات کو بہت اچھی طرح سمجھتا ہے۔ وہ میچ کی ضرورت کے مطابق بلے بازی کرتا ہے اور یہی اس کی سب سے بڑی طاقت ہے۔‘‘

سنگکارا نے بتایا کہ راجستھان رائلز نے ویبھو کے لیے ایک خصوصی منصوبہ تیار کیا ہے تاکہ اس کی ترقی صحیح سمت میں ہو سکے۔

انہوں نے کہا، ’’ہم اس کے دماغ پر غیر ضروری دباو نہیں ڈالنا چاہتے۔ وہ ٹیم کی میٹنگوں میں حصہ لیتا ہے، اپنی رائے دیتا ہے، ویڈیو دیکھ کر تیاری کرتا ہے اور خوب محنت کرتا ہے۔ ہم چاہتے ہیں کہ وہ کھل کر اور نڈر ہو کر بلے بازی کرتا رہے۔‘‘

انہوں نے یہ بھی بتایا کہ میڈیکل ٹیم کے ساتھ مل کر ویبھو کے لیے آئندہ کا تربیتی پروگرام تیار کیا جائے گا اور ناگپور میں منعقد ہونے والے ٹیم کیمپوں میں اسے مناسب پریکٹس کے مواقع دیے جائیں گے۔

راجستھان رائلز کے کپتان ریان پراگ نے میچ کے بعد کہا تھا کہ سیزن کے آغاز میں کسی نے ٹیم کو پلے آف کا دعویدار نہیں مانا تھا۔ اس پر سنگکارا نے کہا کہ انہیں پوری ٹیم کی جدوجہد اور لڑاکا جذبے پر فخر ہے۔

انہوں نے کہا، ’’سیزن کے دوران ہمیں چوٹوں، قریبی ہار اور کئی اتار چڑھاو کا سامنا کرنا پڑا۔ کبھی ہم نے شاندار کرکٹ کھیلی تو کبھی خراب کارکردگی بھی رہی، لیکن ٹیم نے ہمیشہ صبر برقرار رکھا۔‘‘

سنگکارا نے واضح کیا کہ راجستھان رائلز اب صرف نوجوان کھلاڑیوں کو تیار کرنے والی ٹیم نہیں رہ گئی ہے۔

انہوں نے کہا، ’’2022 کے بعد ہم نے اپنی سوچ بدلی ہے۔ ہمارا ہدف ایسی ٹیم بنانا ہے جو میچ اور ٹورنامنٹ جیت سکے۔ ویبھو ایک استثناء ہے، لیکن ہم نے اسے اس لیے چنا کیونکہ ہمیں یقین تھا کہ وہ ہماری بہترین الیون میں کھیلنے کے قابل ہے۔‘‘

انہوں نے کپتان ریان پراگ کی بھی تعریف کرتے ہوئے کہا کہ اپنے پہلے سیزن میں انہوں نے ٹیم کی قیادت شاندار طریقے سے کی اور آنے والے برسوں میں اور بہتر کپتان بنیں گے۔

سنگکارا نے آخر میں کہا، ’’شاید سیزن کے آغاز میں کسی نے نہیں سوچا تھا کہ ہم پلے آف تک پہنچیں گے، لیکن کھلاڑیوں کی محنت اور ٹیم کے جذبے نے یہ ممکن بنایا۔ ہم اگلے سیزن میں اور مضبوط ہو کر لوٹیں گے۔‘‘

ہندوستھان سماچار

---------------

ہندوستان سماچار / انظر حسن