وزیراعلیٰ فڑنویس نے بھی بھوک ہڑتال واپس لینے کی اپیل کیجالنہ ، 30 مئی (ہ س)۔ مراٹھا ریزرویشن سے متعلق مطالبات کے حق میں مراٹھا رہنما منوج جرانگے پاٹل نے ہفتہ کی صبح 10 بجے جالنہ ضلع میں غیر معینہ مدت کی بھوک ہڑتال شروع کر دی ہے۔ منوج جرانگے پاٹل کھلے میدان میں بھوک ہڑتال پر بیٹھے ہیں۔ انہوں نے کہا کہ اگر انہیں کچھ بھی ہوا تو اس کی مکمل ذمہ داری حکومت پر عائد ہوگی۔منوج جرانگے پاٹل سے ملاقات کے لیے آج مراٹھا ریزرویشن ذیلی کمیٹی کے سربراہ اور ریاستی وزیر مال رادھا کرشن وکھے پاٹل براہِ راست جالنہ پہنچے اور انہوں نے ریاستی حکومت کا پیغام ان تک پہنچایا۔ وکھے پاٹل نے کہا کہ حکومت مراٹھا برادری کے مطالبات کے سلسلے میں مکمل طور پر مثبت رویہ رکھتی ہے، اس لیے منوج جرانگے پاٹل کو ضد ترک کرتے ہوئے بھوک ہڑتال ختم کر دینی چاہیے۔ انہوں نے مزید کہا کہ اگر جرانگے پاٹل کو بھوک ہڑتال ہی کرنی ہے تو وہ تیز دھوپ میں بیٹھنے کے بجائے سایہ دار مقام کا انتخاب کریں اور اپنی صحت کو خطرے میں نہ ڈالیں۔رادھا کرشن وکھے پاٹل نے اس موقع پر کہا کہ حکومت تسلیم کرتی ہے کہ بعض معاملات میں تاخیر ہوئی ہے، لیکن وہ اسے انا کا مسئلہ نہیں بنانا چاہتی۔ ان کے مطابق مراتھا برادری کے مطالبات پر سرکاری سطح پر مسلسل کام جاری ہے اور حکومت اس بات سے انکار نہیں کرتی کہ اس عمل کے دوران بعض مشکلات اور خامیاں بھی سامنے آئیں۔ انہوں نے کہا کہ اگر جلد بازی میں کوئی منظوری دے دی جائے اور وہ عدالت میں برقرار نہ رہ سکے تو یہ خود مراتھا سماج کے ساتھ ناانصافی ہوگی۔ اسی لیے قانونی پیچیدگیوں اور تقاضوں کو مدنظر رکھتے ہوئے احتیاط سے پیش رفت کی جا رہی ہے۔دریں اثنا وزیراعلیٰ دیویندر فڑنویس نے بھی منوج جرانگے پاٹل سے اپنی بھوک ہڑتال واپس لینے کی اپیل کی ہے۔ انہوں نے کہا کہ حکومت مراٹھا سماج کے مطالبات کے تئیں پوری طرح مثبت ہے اور مسئلے کے حل کے لیے سنجیدگی سے کام کر رہی ہے، اس لیے جرانگے پاٹل کو احتجاج ختم کرنا چاہیے۔ منوج جرانگے پاٹل نے کہا کہ حکومت کی جانب سے بھیجے گئے پیغام پر وہ اپنی کور کمیٹی اور ماہرین کے ساتھ مشاورت کریں گے، جس کے بعد آئندہ لائحہ عمل کا اعلان کیا جائے گا۔ تاہم حکومت کی مسلسل اپیلوں کے باوجود انہوں نے آج اپنی بھوک ہڑتال شروع کر دی ہے۔اس دوران حکومت کی جانب سے ایک بار پھر مراتھا رہنما سے احتجاج ختم کرنے کی درخواست کی گئی ہے، جبکہ منوج جرانگے پاٹل نے مراتھا سماج سے امن و امان برقرار رکھنے اور پُرامن رہنے کی اپیل کی ہے۔

ہندوستھان سماچار

--------------------

ہندوستان سماچار / جاوید این اے