گوہاٹی، 29 مئی (ہ س) آسام کے گورنر لکشمن پرساد آچاریہ وزارت کے زیراہتمام منعقد ہونے والے ایک نمائشی پروگرام کے لیے منگولیا میں بھگوان بدھ کے دو ممتاز شاگردوں، ارہانت سری پترا اور ارہانت مودگلیائن کے مقدس آثار لے جانے والے ہندوستانی وفد کی قیادت کریں گے۔
مدھیہ پردیش کے سانچی وہار چیتیا میں محفوظ ان مقدس آثار کو 9 جون تک منگولیا میں رکھا جائے گا۔ اس روحانی اور ثقافتی دورے کا مقصد ہندوستان اور منگولیا کے درمیان صدیوں پرانے تہذیبی اور بدھ مت کے رشتوں کو مزید مضبوط کرنا ہے۔
یونیسکو کے عالمی ثقافتی ورثے کے مقام سانچی استوپ سے وابستہ یہ مقدس آثار دنیا بھر میں بدھ مت کے ماننے والوں کے لیے انتہائی عقیدت کا موضوع ہیں۔ یہ اقدام ہندوستان اور منگولیا کے درمیان ثقافتی اور روحانی تعلقات کو مزید مضبوط بنانے کے لیے وزیر اعظم نریندر مودی کی خصوصی پہل پر آیا ہے۔ منگولیا کو بدھ مت کی دنیا میں ہندوستان کا روحانی پڑوسی سمجھا جاتا ہے۔
گورنر اچاریہ ہفتہ کو پورے سرکاری اعزاز کے ساتھ مقدس آثار کو لے کر ایک وفد کے ساتھ روانہ ہوں گے۔ منگولیا میں نمائش کے دوران بڑی تعداد میں عقیدت مند، راہب، علماءاور روحانی پیروکار مقدس آثار کو خراج عقیدت پیش کریں گے۔
اس تقریب کو بدھ مت کے مشترکہ ورثے اور ہندوستان اور منگولیا کے درمیان گہری دوستی کی علامت کے طور پر دیکھا جا رہا ہے۔ گورنر اچاریہ کے 3 جون کو ہندوستان واپس آنے کی امید ہے۔
---------------
ہندوستان سماچار / عبدالسلام صدیقی
